চুবুৰীয়া ৰাজ্য ত্ৰিপুৰাৰ পুনৰ সংঘটিত হৈছে আন এক ৰাজনৈতিক হিংসাত্মক ঘটনা। ৰাজ্যখনৰ শাসনাধিষ্ঠ দল ভাৰতীয় জনতা পাৰ্টিৰ একাংশ উন্মত্ত কৰ্মীৰ আক্ৰমণত নিহত হৈছে বিৰোধী দল চিপিআই-এমৰ এজন কৰ্মী।
এই সংঘৰ্ষত ত্ৰিপুৰাৰ প্ৰাক্তন মন্ত্ৰী তথা বৰ্তমানৰ বিধায়ক ভানু লাল সাহাকে ধৰি চিপিআই-এমৰ আন ১৫ গৰাকী কৰ্মীও আহত হয়।
পশ্চিম ত্ৰিপুৰাৰ চাৰিলামত সংঘটিত এই হিংসাত্মক ঘটনাত এগৰাকী সাংবাদিকো আহত হয় বুলি জানিব পৰা গৈছে। আনহাতে সংঘৰ্ষত নিহত চিপিআই-এম কৰ্মীগৰাকীক ছহিদ মিঞা বুলি চিনাক্ত কৰা হৈছে।
চাৰিলামত আয়োজিত চিপিআই-এম দলৰ এখন ৰাজহুৱা সভাত এই ঘটনা সংঘটিত হয়। ত্ৰিপুৰাৰ শাসকীয় দল বিজেপিয়ে এই আক্ৰমণ সংঘটিত কৰা বুলি অভিযোগ উত্থাপন কৰিছে চিপিআই-এমে।
আক্ৰমণত আহত হোৱা চিপিআই-এম নেতা ভানু লাল সাহাই কয়, ‘আমাক হত্যাৰ উদ্দেশ্যেৰে বিজেপি কৰ্মীয়ে আক্ৰমণ চলায় আৰু আমাৰ ওপৰত বোমা নিক্ষেপ কৰে।”
ইফালে, এই ঘটনাৰ পাছতে অঞ্চলটোৰ আইন-শৃংখলা বজাই ৰখাৰ লগতে সম্ভাৱ্য উত্তেজনাময় পৰিস্থিতি ৰোধ কৰিবলৈ নিৰাপত্তা অধিক শক্তিশালী কৰা হৈছে।
