স্বাধীনতাৰ ৭৫ বছৰ উদযাপনৰ বাবে আজাদী কা অমৃত মহোৎসৱ আঁচনিৰ অধীনত কাৰাদণ্ডৰ দুই তৃতীয়াংশ সম্পূৰ্ণ কৰা কয়দীসকলক মুকলি কৰি দিব ত্ৰিপুৰা চৰকাৰে।
ইয়াৰ পূৰ্বে ভয়ংকৰ অপৰাধী অমিত সাহাকে ধৰি পাঁচজন কয়দীক বিশেষ ক্ষমা প্ৰদান কৰি দুটা পৰ্যায়ত পশ্চিম ত্ৰিপুৰাৰ কেন্দ্ৰীয় কাৰাগাৰৰ পৰা মুকলি কৰি দিয়া হৈছিল।
কাৰাগাৰ বিভাগৰ অ’এছডি অপূৰ্ব কুমাৰ চক্ৰৱৰ্তীয়ে সংবাদ মাধ্যমৰ আগত জনোৱা মতে, ‘‘যিসকল দোষী সাব্যস্ত হোৱা ব্যক্তিয়ে তেওঁলোকৰ কাৰাদণ্ডৰ ৬৬ শতাংশ সম্পূৰ্ণ কৰি ভাল আচৰণ বজাই ৰাখিছে তেওঁলোকৰ বিশেষ ক্ষমাৰ বাবে আমি এক পদক্ষেপ গ্ৰহণ কৰিছো। আজাদী কা অমৃত মহোৎসৱ উপলক্ষে গৃহ পৰিক্ৰমা মন্ত্ৰালয়ৰ নিৰ্দেশনা অনুসৰি এই কাম কৰা হৈছে।’’
অৱশ্যে ৰাজ্যখনৰ বিভিন্ন কাৰাগাৰত ভৰ্তি হোৱা কিমানজন দোষীয়ে কাৰাদণ্ডৰ দুই তৃতীয়াংশ সম্পূৰ্ণ কৰিছে সেই কথা প্ৰকাশ কৰিবলৈ অস্বীকাৰ কৰিছে অপূৰ্ব কুমাৰ চক্ৰৱৰ্তীয়ে।
উল্লেখ্য যে, যি সময়ত উত্তৰ-পূৰ্বাঞ্চলৰ ৰাজ্য সমূহত ধৰ্ষণ, লুন্ঠন, সন্ত্ৰাসবাদ, ড্ৰাগছ আৰু অস্ত্ৰ সৰবৰাহকে ধৰি বিভিন্ন অপৰাধে গা কৰি উঠিছে, সেই সময়ত এইদৰে অপৰাধী সকলৰ শাস্তি ক্ষমা কৰি দিয়াৰ ঘটনাই শাস্তিৰ প্ৰতি অপৰাধীসকলক ভীতিগ্ৰস্ততা হ্ৰাস কৰিব বুলি শংকা আৰু প্ৰতিক্ৰিয়া প্ৰকাশ কৰিছে বিভিন্ন মহলে।
