আন্তৰাষ্ট্ৰীয় সংবাদ মাধ্যমত প্ৰকাশিত এক খবৰে এতিয়া চিন্তিত কৰি তুলিছে টুইটাৰৰ বহু কৰ্মচাৰীক ।খবৰ অনুসৰি শেহতীয়াকৈ টুইটাৰ ক্ৰয় কৰা এলন মাস্কে কোম্পানীটোৰ আধা কৰ্মচাৰীকে ছাটাই কৰাৰ কথা ভাবিছে।জানিব পৰা মতে চলিত মাহৰ আৰম্ভণিতে ৩,৭০০ কৰ্মচাৰীৰ ছাটাই আৰম্ভ হ’ব।
উল্লেখ্য কোম্পানীটোৰ মুখ্য কাৰ্যবাহী বিষয়া পৰাগ আগৰৱালাক ইতিমধ্যে অপসাৰণ কৰা হৈছে। জানিব পৰা মতে মাস্কে প্ৰথম পৰ্যায়ত কোম্পানীটোৰ মুঠ কৰ্মশক্তিৰ এক-তৃতীয়াংশ ছাটাই কৰা হ’ব বুলি সিদ্ধান্ত লোৱা হৈছে। তাৰ পিছত কৰ্মচাৰীৰ সংখ্যা ক্ৰমান্বয়ে আধা কৰা হ’ব। টুইটাৰৰ মুখ্য কাৰ্যবাহী বিষয়া পৰাগ আগৰৱালা আৰু কোম্পানীৰ ‘মুখ্য বিত্তীয় বিষয়া’ নেড চেগালক ইতিমধ্যে বৰ্খাস্ত কৰা হৈছে। পৰাগে ছান ফ্ৰান্সিস্কোৰ টুইটাৰৰ মুখ্য কাৰ্যালয় এৰিছে।
বৃহস্পতিবাৰে সন্ধিয়া বিশ্বৰ এক নম্বৰ স্থানৰ ধনী ব্যক্তিগৰাকীয়ে এক বিবৃতি জাৰি কৰি কয় যে তেওঁ টুইটাৰ অধিগ্ৰহণ কৰিছে। মাস্কে কয় যে তেওঁৰ এই পদক্ষেপ “মানৱতাৰ স্বাৰ্থত” লোৱা হৈছে।
মাস্কে টুইটাৰত লিখিছে, “মই কিয় টুইটাৰ অধিগ্ৰহণ কৰিলো মই সকলোকে জনাব বিচাৰো।” মই অধিক টকা উপাৰ্জন কৰিবলৈ ক্ৰয় কৰা নাই। মই এইটো মানৱতাৰ বাবে কিনিছো। মানৱতাৰ ভৱিষ্যত এনেকুৱা হ’ব লাগে যে সকলো পক্ষৰ বাবে স্বতন্ত্ৰ মতামত প্ৰকাশ কৰাৰ বাবে এটা ডিজিটেল প্লেটফৰ্ম থাকিব। এক সুস্থ পৰিৱেশত বিতৰ্ক হ’ব।”
মাস্কে লগতে কয়, “এই মুহূৰ্তত এক বিপদজনক পৰিস্থিতি আহিছে, য’ত ছ’চিয়েল মিডিয়া অতি কট্টৰ সোঁপন্থী আৰু অতি কট্টৰ বাওঁপন্থীৰ কেইবাটাও গোটত বিভক্ত হ’বলৈ আগবাঢ়িছে। যিয়ে সমাজত ঘৃণা আৰু বিভাজন বৃদ্ধি কৰিব।”
