অৰুণাচল প্ৰদেশৰ টিৰাপ জিলাত দেওবাৰে বিয়লি অসম ৰাইফলছৰ খোংছা বেটেলিয়ন আৰু আৰক্ষীৰ যৌথ অভিযানত অস্ত্ৰ শস্ত্ৰসহ আলফা স্বাধীনৰ দুজন কেডাৰক আটক কৰা হয়।
এক গোপন সূত্ৰৰ পম খেদি নিৰাপত্তা বাহিনীয়ে সীমান্তৱৰ্তী গাঁও নোগলোত অভিযান চলাই অসমত বিধ্বংসী কাৰ্যকলাপ চলাবলৈ ভাৰত-ম্যানমাৰ সীমান্ত পাৰ হৈ অহা দুই দুৰ্ধৰ্ষ উগ্ৰপন্থীক আটক কৰে।
লগতে পঢ়কঃ Gandhi Jayanti 2023: জাতিৰ পিতা মহাত্মা গান্ধীৰ ১৫৪ সংখ্যক জয়ন্তীত তেওঁৰ কেইটামান বিখ্যাত উক্তি
আটকাধীন কেডাৰ দুজন নীলোৎপল অসম ওৰফে মনজিৎ গগৈ আৰু উপেন অসম ওৰফে ৰোহিনী গগৈ বুলি চিনাক্ত কৰা হৈছে। দুয়োজন অসমৰ বাসিন্দা আৰু যোৱা বছৰ আলফা-স্বাধীনত যোগদান কৰিছিল।
উগ্ৰপন্থী দুজনৰ পৰা আৰক্ষীয়ে অস্ত্ৰ-শস্ত্ৰ আৰু গুলী বাৰুদ উদ্ধাৰ কৰে।
স্বাধীন অসম বিচৰা বিচ্ছিন্নতাবাদী সংগঠন আলফা-স্বাধীনৰ ম্যানমাৰত ঘাটি থকা বুলি জনা যায়। শেহতীয়া বছৰবোৰত এই গোটটোৱে ভাৰতৰ ভূখণ্ডত প্ৰৱেশ কৰি বিশেষকৈ নিৰ্বাচনৰ আগত কূটাঘাতমূলক কাৰ্যকলাপ চলাবলৈ চেষ্টা কৰি আহিছে।
লগতে পঢ়কঃ কাজিৰঙাত উদ্ধাৰ গঁড়ৰ মৃতদেহ: চোৰাং চিকাৰৰ সম্ভাৱনা অস্বীকাৰ বন বিভাগৰ
চলিত বছৰতে অৰুণাচল প্ৰদেশৰ দক্ষিণ অঞ্চলত আলফা-স্বাধীনৰ কেডাৰসকলৰ ব্যাপক সংখ্যক আটক হোৱা তথা আত্মসমৰ্পণে গোটটোৰ কাৰ্যকলাপ আৰু ভেটিত গুৰুতৰ আঘাত হানিছে।
