আলফা (স্বা)ৰ পৰা পলাবলৈ চেষ্টা কৰাৰ অপৰাধত সংগঠনটোৱে বহুকেইজন যুৱক তথা সদস্যক চৰম শাস্তি হিচাপে মৃত্যুদণ্ড দিয়া বুলি শেহতীয়াকৈ ওলোৱা এক বাতিৰয়ে বিশেষ চৰ্চা লাভ কৰিছে। আৰু এই কথা সত্য বুলি আলফা (স্বা)ৰ মুখ্য সেনাধক্ষ্য পৰেশ বৰুৱাই এটা বৈদ্যুতিন সংবাদ মাধ্যমৰ সাক্ষাৎকাৰত স্বীকাৰ কৰিছে।
বৈদ্যুতিন সংবাদ মাধ্যমটোৰ আগত টেলিফোনিক বাৰ্তালাপত পৰেশ বৰুৱাই কয় যে, ‘এয়া সংগঠনৰ বিষয়। আলফা (স্বাধীন)ৰ সংবিধানৰ বিষয়। উত্থাপিত বিষয়টো সচাঁ। কিন্ত, একাংশ সংবাদ মাধ্যমত সম্প্ৰচাৰিত হোৱাৰ দৰে কথাবোৰ নহয়। আমাৰ মাজত কোনো ভ্ৰাতৃঘাতী সংঘাট হোৱা নাই ৷ ভ্ৰাতৃঘাতী সংঘাট হোৱাৰ কোনো অৱকাশেই নাই আলফা (স্বাধীন)ত। সম্পূৰ্ণ বিধিমতে, সংবিধান মতে চলা সংগঠন আলফা (স্বাধীন)। আমাৰ কথা ভালকৈ নজনাকৈ একাংশই একপক্ষীয়ভাৱে বাতৰি সম্প্ৰচাৰ কৰাতো দুৰ্ভাগ্যজনক।’
তাৰোপৰি মৃত্যুদণ্ড দিয়াৰ কাৰণ হিচাপে আলফা (স্বা)ৰ মুখ্য সেনাধ্যক্ষ গৰাকীয়ে বৈদ্যুতিন সংবাদ মাধ্যমটোৰ আগত কয় যে, ‘আমাৰ সংবিধান মতে অস্ত্ৰলৈ পলায়ন কৰিলে চৰম শাস্তি দিয়া হয় ৷ সংগঠনত অস্ত্ৰ সংগ্ৰহ কৰাতো সকলোতকৈ কঠিন কাম ৷ তাতে কোনোবাই অস্ত্ৰলৈ পলায়ন কৰিব আৰু সংগঠনে মৌন হৈ বহি থাকিব? সেয়া সংগঠনৰ নীতি বৰ্হিভূত বিষয় ৷ সেয়ে সংবিধানে চৰম শাস্তিৰ কথা কৈছে ৷ লগতে সংগঠনৰ শত্ৰুক যিয়ে সংগঠনৰ মজিয়াৰ পৰা গোপন বাৰ্তা যোগান ধৰে, সেই সদস্যক চৰম শাস্তি বিহাৰ বিধি আছে ৷ এই আটাইকেইটাতে জড়িত আছিল সেইকেইজন সদস্য ৷ শত্ৰুক সংগঠনৰ গোপন খবৰ যোগান ধৰিছিল ৷ লগতে সংগঠনৰ অস্ত্ৰলৈ পলায়ন কৰিছিল ৷ অস্ত্ৰলৈ পলায়ন কৰোতে ধৰা পৰিছিল আৰু সংগঠনৰ আদালতত চলা বিচাৰ প্ৰক্ৰিয়াত দোষী সাব্যস্ত হোৱাত চৰম শাস্তি বিহা হয় ৷’
শেহতীয়াকৈ বহু সদস্যই আত্মসমৰ্পণ কৰা সন্দৰ্ভত পৰেশ বুৰৱাই কয় যে, ‘কম ধতোৱাবোৰ গুচি যোৱাত আমাৰ ভালেই হৈছে। জাতিৰ কাৰণে কাম কৰিম বুলি অহা সকলে অলপ কষ্টতে যি পলায়, সেয়া সংগঠনৰ বাবে অযোগ্য। তেনে সদস্য সংগঠনত নথকাই ভাল।’
