মুখ্যমন্ত্ৰী হিমন্ত বিশ্ব শৰ্মাৰ ডিব্ৰুগড় ভ্ৰমণৰ দিনটোতে মৰাণ আৰক্ষীৰ জালত পৰিল আলফা স্বাধীনৰ এজন আণ্ডাৰগ্ৰাউণ্ড সদস্য । ডিব্ৰুগড় জিলাৰ মৰাণৰ ১নং মিৰিহোলাৰ পৰা মৰাণ আৰক্ষীয়ে গ্ৰেপ্তাৰ কৰে ছফিউদ্দিন আহমেদ ওৰফে ছফিক নামৰ যুৱকজনক ।
ইতিমধ্যে মৰাণ আৰক্ষীয়ে 62/25 নম্বৰৰ 308(5)bns 10/13UAP act-ৰ জৰিয়তে গোচৰ ৰুজু কৰি যুৱকজনৰ বিৰুদ্ধে তদন্ত আৰম্ভ কৰিছে । জানিব পৰা মতে, যুৱকজনে মৰাণৰ লগতে ইয়াৰ দাঁতি কাষৰীয়া অঞ্চলত নিষিদ্ধ সংগঠনৰ হৈ ধন দাবী আৰু ধন সংগ্ৰহ কৰি আহিছিল । লগতে বহু ব্যৱসায়ীৰ ফোন নম্বৰ উক্ত সংগঠনটোক যোগান ধৰা বুলিও জানিব পৰা গৈছে ।
ছফিকৰ সৈতে আন কেইবাজনো লোক জড়িত থকা বুলি আৰক্ষীয়ে বিশেষ সূত্ৰৰ পৰা জানিব পৰা পাৰিছে । এই সম্পৰ্কে মৰাণ আৰক্ষীয়ে চলাইছে তদন্ত । মৰাণৰ মাজমজিয়াৰ পৰা নিষিদ্ধ ঘোষিত সংগঠনৰ আণ্ডাৰগ্ৰাউণ্ড সদস্য আৰক্ষীৰ জালত পৰাত সৃষ্টি হৈছে তীব্ৰ চাঞ্চল্যৰ ।
