চৰাইদেউ জিলাত ভাৰতীয় সেনা বাহিনীৰ অভিযানকাৰী দলে ৩০ ডিচেম্বৰত অভিযান চলাই লক্ষেশ্বৰ বৰুৱা ওৰফে ধূপ সিং ওৰফে লবন অসম নামৰ এগৰাকী আলফা(স্বা) লিংকমেনক আটক কৰে।
চৰাইদেউ আৰক্ষী, সাপেখাতী আৰু বৰহাট ডাঙৰীকুমাৰ সেনা শিবিৰৰ যৌথ অভিযানত চৰাইদেউ জিলাৰ দিল্লীঘাট অঞ্চলৰ পৰা লিংকমেনজনক আটক কৰিবলৈ সক্ষম হয় অভিযানকাৰী দলটোৱে।
আনহাতে, আটকাধীন লোকজনৰ পৰা এটা ৭.৬৫ এম এম পিষ্টল আৰু আলফা(স্বা)ৰ পতাকা উদ্ধাৰ কৰা হৈছে।
সেনাই আটক কৰা লক্ষেশ্বৰ বৰুৱাৰ ঘৰ তিনিচুকীয়া জিলাৰ বৰডুমচা অঞ্চলত।
লক্ষেশ্বৰ বৰুৱাই দীৰ্ঘদিনৰ পৰা অঞ্চলটোত আলফা(স্বা)ৰ হৈ কাম কৰি আছিল বুলি সেনা বাহিনীৰ সূত্ৰত প্ৰকাশ কৰা হৈছে আৰু অধিক তথ্যৰ বাবে সম্প্ৰতি তেওঁক সেনাই জেৰা অব্যাহত ৰাখিছে।
উল্লেখোগ্য যে, উজনি অসমত আলফা স্বাধীনে নাগৰিকত্ব (সংশোধনী) আইন বিৰোধী আন্দোলনৰ সময়ত নতুন সদস্য ভৰ্তিৰ বাবে কুচকাৱাজ অব্যাহত ৰাখিছে বুলি সেনা বাহিনীৰ তৰফৰ পৰা জানিবলৈ দিছে।
