যোৱা সোমবাৰে ম্যানমানৰ সেনাই দেশখনৰ ক্ষমতা বলপূৰ্বকভাৱে হস্তগত কৰাৰ পিছতে বিশ্ব সম্প্ৰদায়ে ম্যানমাৰৰ ৰাজনৈতিক অস্থিৰতকালৈ উদ্বিগ্ন হৈ পৰিছে।
দক্ষিণ পূৱ এছিয়াৰ পাহাৰীয়া দেশখনত নতুনকৈ পোখা মেলা গণতন্ত্ৰৰ যাতে মৃত্যু নহয় তাৰবাবে বিশ্ব সম্প্ৰদায়ে ঐক্যৱদ্ধ প্ৰচেষ্টাৰে সামৰিক জুণ্টা প্ৰশাসনক বাধ্য কৰিবলৈ মন্ত্ৰণা আৰম্ভ কৰিছে বুলি জানিব পৰা গৈছে।
ইতিমধ্যে ম্যানমাৰত গণতন্ত্ৰ ৰক্ষা তথা ৰাজনৈতিক অস্থিৰতাক উপশম কৰাৰ বাবে ৰাষ্ট্ৰ সংঘৰ নিৰাপত্তা পৰিষদে জৰুৰী বৈঠক তলৱ কৰিছে।
ৰাষ্ট্ৰসংঘৰ মহাসচিব এন্ট’নিঅ’ গুটেৰেচে ম্যানমাৰৰ সমাৰিক অভ্যুত্থানক গণতন্ত্ৰৰ ওপৰত ‘ভীষণ আঘাত’ বুলি মন্তব্য কৰিছে।
ইফালে ৰাষ্ট্ৰ সংঘৰ ব্ৰিটেইনৰ দূত বাৰবাৰ উডৱাৰ্ডে যোৱা বৰ্ষৰ নৱেম্বৰ মাহৰ সাধাৰণ নিৰ্বাচনক বৈধ বুলি ঘোষণা কৰি জুণ্টা প্ৰশাসনক তীব্ৰ নিন্দা কৰিছে।
উল্লেখ্য উক্ত নিৰ্বাচনত ম্যানমাৰৰ গণতন্ত্ৰ প্ৰতিষ্ঠাৰ নেত্ৰী আং চু ক্যি দলে নিৰংকুশ সংখ্যাঘৰিষ্ঠতা লাভ কৰিলেও জুণ্টাই এই নিৰ্বাচনত জালিয়াতি হোৱা বুলি অভিযোগ উত্থাপন কৰি আহিছিল।
আনহাতে লণ্ডনে জুণ্টা প্ৰশাসনৰ কৱলৰ পৰা অতি শীঘ্ৰেই নেত্ৰী আং চু ক্যিক মুকলি কৰিবলৈ চেষ্টা চলাব বুলি ঘোষণা কৰিছে।
উল্লেখ্য যে সোমবাৰে জুণ্টাই দেশৰ ক্ষমতা বলপূৰ্বকভাৱে হস্তগত কৰাৰ পিছৰে পৰা পাহাৰীয়া দেশখনত ফোন আৰু ইন্টাৰনেট সেৱা বন্ধ কৰি দিয়া হৈছে।
ইয়াৰ ফলত ম্যানমাৰত থকা ৰাষ্ট্ৰ সংঘৰ কোনো বিষয়াৰ সৈতে যোগাযোগ সম্ভৱ হোৱা নাই বুলি জনাইছে ৰাষ্ট্ৰ সংঘৰ প্ৰতিনিধি স্তিফানি দুজাৰিকে।
উল্লেখ্য যে ম্যানমাৰত জুণ্টাই ক্ষমতা দখল কৰাৰ পিছতে দেশখনৰ ৰাখাইল প্ৰদেশত বাস কৰা ৰোহিংগাসকলৰ জীৱনলৈ আৰু অধিক ভাবুকি আহি পৰিব বুলি শংকা কৰিছে বিশ্ব সম্প্ৰদায়ে।
