পঞ্চায়ত নিৰ্বাচনত চোৰাং চিকাৰীক লৈ সৃষ্টি হোৱা বিতৰ্ক শেষ নৌহওঁতেই যোৱা নিশা কাজিৰঙাত পুনৰ গঁড় হত্যাৰ ঘটনা সংঘৰ্টিত হয় ৷ কাজিৰঙা ৰাষ্ট্ৰীয় উদ্যানৰ বাগৰি বনাঞ্চলৰ ভলুকাজান বন শিৱিৰ এলেকাত যোৱা নিশা চোৰাং চিকাৰীয়ে এটা গঁড় হত্যা কৰি খৰ্গ লৈ উধাও হয় ৷
অতি সংগোপনে কৰা এই অমানুষিক হত্যাৰ গমেই নাপালে বনকৰ্মীয়ে ৷ আজি পুৱা হাতীত উঠি উদ্যান দৰ্শনৰ বাবে যোৱা পৰ্যটকেহে ভলুকাজান এলেকাত মৃত গঁড়টো প্ৰত্যক্ষ কৰি বনকৰ্মীক জনায় ৷ তেতিয়াহে পোহৰলৈ আহে গঁড় হত্যাৰ এই ঘটনা ৷
মতা গঁড়টোৰ কাণৰ তলতে এটা ৩৹৩ বন্দুকৰ গুলীৰ আঘাত দেখা গৈছে ৷ উল্লেখ্য যে চলিত বৰ্ষত কাজিৰঙা ৰাষ্ট্ৰীয় উদ্যানত গঁড় হত্যাৰ এইয়া সপ্তমটো ঘটনা ৷ ইয়াৰ আগতে ৰাষ্ট্ৰীয় উদ্যানখনত চোৰাংচিকাৰীয়ে ৬ টাকৈ গঁড় হত্যা কৰি খৰ্গ কাটি লৈ যাবলৈ সক্ষম হৈছিল ৷ ইয়াৰে বাগৰি বনাঞ্চলত সংঘটিত হোৱা এয়া তৃতীয়টো ঘটনা৷
পুৱা ঘটনা পোহৰলৈ অহাৰ পাছত ঘটনাস্থলীত উপস্থিত হৈছে উচ্চ পদস্থ বিষয়া ৷ ঘটনাস্থলীৰ পৰা চিকাৰীৰ গতি বিধি লক্ষ্য কৰাৰ বাবে এতিয়া স্নিফাৰ ডগৰ ব্যৱহাৰ কৰা হৈছে যদিও চোৰাং চিকাৰীয়ে বন বিভাগৰ বাবে ঘটনাস্থলীত কোনো ধৰণৰ শুং সূত্ৰ এৰি যোৱা নাই ৷ সম্প্ৰতি চোৰাং চিকাৰীৰ সন্ধানত বন কৰ্মীয়ে এটা অভিযান আৰম্ভ কৰিছে ৷
