বাৰে বাৰে বিয়া পাতিছে যদিও কোনোমতে “আদৰ্শ সংগী” বিচাৰি পোৱা নাই। উত্তৰ প্ৰদেশৰ এজন অধ্যাপকে দুবছৰৰ ভিতৰত চতুৰ্থবাৰৰ বাবে বিবাহ বিচ্ছেদৰ বাবে আবেদন দাখিল কৰিছে। উত্তৰ প্ৰদেশৰ বাৰেলীত সংঘটিত হৈছে এই অদ্ভুত ঘটনা। অধ্যাপকগৰাকীৰ নাম আৰু পৰিচয় ৰাজহুৱা কৰা হোৱা নাই।
সংবাদ মাধ্যমৰ খবৰ অনুসৰি তেওঁ ইতিমধ্যে চাৰিবাৰ বিবাহপাশত আবদ্ধ হৈছে। ইয়াৰে তিনিটা বিবাহ বিগত দুবছৰৰ ভিতৰত হৈছে। কিন্তু তেওঁৰ কোনোটো বিবাহে সফল নহ’ল। প্ৰথম তিনিটা বিবাহৰ অন্ত পৰে বিবাহ বিচ্ছেদত। এইবাৰ চতুৰ্থ পত্নীৰ পৰাও বিবাহ বিচ্ছেদ বিচাৰি আদালতলৈ যোৱা বুলি জানিব পৰা গৈছে।
বাতৰি অনুসৰি, অধ্যাপকগৰাকীয়ে আদালতত দাবী কৰিছে যে তেওঁ একেৰাহে চাৰিবাৰ বিয়া হোৱাৰ কাৰণ হৈছে এগৰাকী “আদৰ্শ” জীৱন সংগী বিচাৰি পোৱা। কিন্তু তেওঁ প্ৰতিবাৰেই ‘ব্যৰ্থ’ হৈছে। খবৰ অনুসৰি তেওঁ আদালতত কয় যে যদি তেওঁ “মনৰ মানুহ”জনীক বিচাৰি পায় তেন্তে তেওঁ আৰু কেতিয়াও বিয়া নাপাতে।
অধ্যাপকগৰাকীয়ে লগতে বাখ্যা কৰে যে যেতিয়াই তেওঁৰ পত্নীয়ে অসুখী বা তেওঁৰ জীৱনশৈলীৰ লগত খাপ খাব পৰা নাই বুলি অনুভৱ কৰে তেতিয়াই তেওঁ বিবাহ বিচ্ছেদৰ বাবে আবেদন কৰে। অৱশ্যে অধ্যাপকগৰাকীয়ে কয় যে বিচ্ছেদৰ পিছত তেওঁ নিজৰ প্ৰাক্তন পত্নীসকলক পোহপাল দিয়াৰ দায়িত্ব লয়।
কিন্তু অধ্যাপকগৰাকীৰ একাধিক বিবাহ আৰু একেৰাহে বিবাহ বিচ্ছেদক লৈ সমালোচনা আৰম্ভ হৈছে। চতুৰ্থ পত্নীৰ অভিযোগৰ ভিত্তিত তেওঁ তদন্তৰ সন্মুখীন হোৱা বুলিও জানিব পৰা গৈছে।
আদালতক দিয়া এক বিবৃতিত অধ্যাপকগৰাকীৰ ৩২ বছৰীয়া চতুৰ্থ পত্নীয়ে কয় যে মোৰ স্বামীৰ বিবাহ বিচ্ছেদৰ প্ৰতি প্ৰৱণতা আছে। তেওঁ যেনেকৈ আন পত্নীক পৰিত্যাগ কৰিলে, তেনেকৈয়ে তেওঁ মোকো একেদৰেই পৰিত্যাগ কৰিব বিচাৰে। “আই ৱাণ্ট জাষ্টিচ।” লগতে তেওঁ অধ্যাপকগৰাকীৰ বিৰুদ্ধে মানসিক নিৰ্যাতনৰ অভিযোগ উত্থাপন কৰে।
খবৰটো পোহৰলৈ অহাৰ লগে লগে ছচিয়েল মিডিয়াত তোলপাৰ লাগে। বিতৰ্কৰো সৃষ্টি হৈছে। বহুতে বাৰে বাৰে বিবাহ আৰু বিবাহ বিচ্ছেদৰ আইনী দিশক লৈও প্ৰশ্ন উত্থাপন কৰিছে।
