সমাগত বিটিচি পৰিষদীয় নিৰ্বাচনক কেন্দ্ৰ কৰি বিটিআৰৰ চাৰিখন জিলাত বিভিন্ন ৰাজনৈতিক দল সংগঠনে নিৰ্বাচনী প্ৰচাৰ অভিযান তীব্রতৰ কৰি তুলিছে ।
প্ৰমোদ বড়ো নেতৃত্বাধীন ইউপিপিএল দলেও বিটিআৰৰ চাৰিওখন জিলাতে পদযাত্ৰা কাৰ্যসূচীৰে ব্যাপক নিৰ্বাচনী প্ৰচাৰ অব্যাহত ৰাখিছে ।
বিপিএফৰ ১৭ বছৰীয়া শাসন ওফৰাবলৈ পৰিৱৰ্তনৰ স্বাৰ্থত ইউপিপিএল দলে পদযাত্ৰা কাৰ্যসূচী হাতত লৈ গাঁৱে ভূঞে প্ৰচাৰ অব্যাহত ৰাখিছে ।
তামুলপুৰ বিধানসভা সমষ্টিৰ অন্তৰ্গত ২৭ নং নাগ্ৰীজুলি বিটিচি পৰিষদীয় সমষ্টিৰ বৃহত্তৰ কাউলীৰ চন্দ্ৰনগৰত ২ নং পূব কুমাৰীকাটা ভিচিডিচি প্ৰাইমাৰী কমিটিৰ নেতৃত্বত পৰিৱৰ্তনৰ স্বাৰ্থৰে শুকুৰবাৰে এক পদযাত্রা কাৰ্যসূচী ৰূপায়ন কৰে।
সমষ্টিটোৰ প্ৰাৰ্থী সুশীল দাসে অংশ লোৱা এই পদযাত্ৰা কাৰ্যসূচীৰ দ্বাৰা প্ৰতিজন লোকৰ ঘৰে ঘৰে গৈ নিৰ্বাচনী প্ৰচাৰ চলোৱাৰ লগতে ইউ পি পি এল দলৰ লক্ষ্য আৰু উদ্দেশ্য সম্পৰ্কে ৰাইজক অৱগত কৰোৱা হয়।
২৭ নং নাগ্ৰীজুলি পৰিষদীয় সমষ্টিৰ ইউ পি পি এল দলৰ প্ৰাৰ্থী সুশীল দাসে সংবাদ মাধ্যমৰ আগত প্ৰকাশ কৰে যে, বিটিআৰ অঞ্চলৰ জনসাধাৰণে অপশাসনৰ অৱসান ঘটাই পৰিৱৰ্তন বিচাৰিছে ।
প্ৰচণ্ড বৰষুণকো নেওচি ২৭ নং নাগ্ৰীজুলি বিটিচি পৰিষদীয় সমষ্টিটোৰ কাউলিৰ চন্দ্ৰনগৰৰ পৰা আৰম্ভ কৰা এই পদযাত্ৰা কাৰ্যসূচীত শতাধিক পুৰুষ-মহিলা, ইউপিপিএল দলৰ নেতা-কৰ্মীয়ে অংশগ্ৰহণ কৰে।
