বুধবাৰে সন্ধিয়া কোকৰাঝাৰৰ বাওঁখুংগ্রী সমষ্টিৰ নয়াগাঁওত আছিনাক্ত দুৰ্বৃত্তৰ দলে য়ুপিপিএলৰ সভাপতি প্ৰমোদ বড়োৰ গাড়ীত শিলাবর্ষণ কৰি আক্ৰমণ কৰাৰ প্ৰতিবাদত আজি তামুলপুৰত য়ুপিপিএলে তীব্ৰ প্ৰতিবাদ সাব্যস্ত কৰে।
আজি ৰাতিপুৱা য়ুপিপিএলৰ তামুলপুৰ জিলা সমিতিৰ নেতা-কৰ্মী সহ সহস্ৰাধিক সমৰ্থকে ৰঙিয়া-তামুলপুৰ-ভূটান পথৰ মটঙা চ’কত হাগ্ৰামা মহিলাৰী আৰু বাওঁখুঙগ্ৰী সমষ্টিৰ বিপিএফ দলৰ প্ৰাৰ্থী ডানেস্বৰ গয়াৰীৰ প্ৰতিমূৰ্তি দাহ কৰি প্ৰতিবাদ সাব্যস্ত কৰে।
প্ৰতিবাদকাৰী সকলে য়ুপিপিএল জিন্দাবাদ, হাগ্ৰামা মহিলাৰী মূর্দাবাদ, ডানেস্বৰ গয়াৰী মূর্দাবাদ, বিপিএফ গ’বেক, আক্রমণকাৰীক শীঘ্ৰে আটক কৰক, স্বচ্ছ আৰু নিকা নিৰ্বাচন অনুষ্ঠিত কৰক আদি শ্লোগান দি তামুলপুৰৰ আকাশ বতাহ কঁপাই তোলে।
প্ৰতিবাদী কাৰ্যসূচী ৰূপায়ণৰ ফলত ৰঙিয়া-ভূটান পথ বান্ধ হৈ পৰি কিছু সময় তীব্ৰ যানজতৰ সৃষ্টি হয়।
প্ৰতিবাদী কাৰ্যসূচীৰ অন্তত তামুলপুৰ জিলা য়ুপিপিএল দলৰ সভাপতি বিপুল কুমাৰ বসুমতাৰীয়ে সংবাদ মাধ্যমক কয় যে নিৰ্বাচন এক গণতান্ত্ৰিক প্ৰক্ৰিয়া। হিংসাৰে বিপিএফ দলে গণতান্ত্ৰিক প্ৰক্ৰিয়াক বাধা দিব খুজিছে।
পোন্ধৰ বছৰে শোষণ চলোৱা হাগ্ৰামা মহিলাৰী নেতৃত্বাধী বিপিএফ দল এতিয়া শংকিত হৈ পৰা বাবে এনে হিংসাত্মক কাৰ্যত লিপ্ত হৈছে অতি শীঘ্ৰে প্ৰমোদ বড়োৰ গাড়ীত আক্ৰমণ কৰা দুৰ্বৃত্ত সকলক আটক কৰিবলৈ বিপুল কুমাৰ বসুমতাৰীয়ে আৰক্ষী প্ৰশাসনক দাবী জনায়।
আৰক্ষীয়ে তাৎক্ষণিকভাৱে অপৰাধী সকলক আটক নকৰিলে তীব্ৰ গণতান্ত্ৰিক আন্দোলন গঢ়ি তোলা হব বুলিও হুংকাৰ দিয়ে ইউপিপিএল নেতা গৰাকীয়ে।
