তিনিদীয়া ভ্ৰমণ সূচীৰে ভাৰতলৈ অহা মাৰ্কিন যুক্তৰাষ্ট্ৰৰ প্ৰতিৰক্ষা সচিব লয়েড আষ্টিনে শুকুৰবাৰে ভাৰতত উপস্থিত হয়।
ভাৰতত উপস্থিত হৈয়ে মাৰ্কিন প্ৰতিৰক্ষা সচিব আষ্টিনে প্ৰধানমন্ত্ৰী নৰেন্দ্ৰ মোদীৰ সৈতে বৈঠকত অংশগ্ৰহণ কৰে।
ভাৰতৰ বৈদেশিক মন্ত্ৰণালয়ে প্ৰকাশ কৰা অনুসৰি প্ৰধানমন্ত্ৰী মোদী আৰু মাৰ্কিন নিৰাপত্তা সচিব আষ্টিনৰ সৈতে হোৱা আলোচনাত দুই দেশৰ দ্বিপাক্ষিক সম্পৰ্ক অধিক উন্নত কৰাৰ ক্ষেত্ৰত গুৰুত্ব আৰোপ কৰা হৈছে।
ইফালে ৰাজনৈতিক আৰু কূটনৈতিক বিশ্লেষকসকলৰ মতে মাৰ্কিন প্ৰতিৰক্ষা সচিব আষ্টিনৰ তিনিদিনীয়া ভ্ৰমণ সূচীত দুটা বিষয়ে মূলতঃ গুৰুত্ব পাব।
লগতে পঢ়ক : আলোচনাৰ পূৰ্বে ভাৰতৰ মানৱ অধিকাৰ ভংগৰ কথা সোঁৱৰাই দিলে শীৰ্ষ মাৰ্কিন নীতি নিৰ্ধাৰকে
ইয়াৰে প্ৰথমটো হৈছে ভাৰত-চীন সীমান্তৰ লাডাখৰ সামৰিক সংঘৰ্ষ আৰু দ্বিতীয়টো হৈছে ৰাছিয়াৰ পৰা ভাৰতে ক্ৰয় কৰিবলগীয়া এছ ৪০০ প্ৰতিৰক্ষা মিছাইলৰ প্ৰসংগ।
ভাৰতৰ প্ৰতিৰক্ষা মন্ত্ৰী ৰাজনাথ সিঙৰ সৈতে কেবালানিও আলোচনাত অংশগ্ৰহণ কৰিব মাৰ্কিন প্ৰতিৰক্ষা সচিব গৰাকীয়ে। ইতিমধ্যে দুই দেশৰ প্ৰতিৰক্ষা বিভাগৰ শীৰ্ষ কাৰ্যবাহী দুগৰাকীয়ে আলোচনাত মিলিত হৈছে।
ইয়াৰ পিছতে ভাৰতৰ চিফ ডিফেন্স ষ্টাফ বিপিন ৰাৱাটৰ সৈতে ভাৰতীয় সেনা বাহিনীৰ তিনিওটা বিভাগৰে সেনাপ্ৰধানসকলে আষ্টিনক সাক্ষাৎ কৰিব।
আষ্টিনে ভাৰত-মাৰ্কিন প্ৰতিৰক্ষা বুজাপৰা বৃদ্ধিত অধিক গুৰুত্ব প্ৰদান কৰা বুলি জানিব পৰা গৈছে।
উল্লেখ্য যে জ’ বিডেনে আমেৰিকাৰ ৰাষ্ট্ৰপতি হিচাপে কাৰ্যভাৰ লোৱাৰ পিছত পোন প্ৰথমবাৰ মাৰ্কিন কেবিনেটৰ কোনো শীৰ্ষ কাৰ্যনিবাহকে ভাৰত ভ্ৰমণলৈ আহিছে।
আষ্টিনৰ এই ভ্ৰমণে আগন্তুক চাৰি বছৰৰ ভাৰত-মাৰ্কিন সম্পৰ্কৰ গতি প্ৰকৃতি নিৰূপণ কৰিব বুলি ধাৰণা কৰা হৈছে।
