শুকুৰবাৰে আলাস্কাৰ ওপৰত এটা অচিনাক্ত বস্তু (high-altitude object) গুলীয়াই ভূপতিত কৰে আমেৰিকা যুক্তৰাষ্ট্ৰৰ যুঁজাৰু বিমানে। হোৱাইট হাউছৰ তৰফৰ পৰা এই কথা জনোৱা হৈছে। অৱশ্যে অচিনাক্ত লক্ষ্যটোৰ উদ্দেশ্য বা উৎপত্তি কি সেয়া অস্পষ্ট হৈ আছে।
নেশ্যনেল ছিকিউৰিটি কাউন্ সিলৰ মুখপাত্ৰ জন কিৰ্বিয়ে কয়, “ৰাষ্ট্ৰপতিয়ে সামৰিক বাহিনীক বস্তুটো ভূপতিত কৰিবলৈ নিৰ্দেশ দিছিল।” তেওঁ সন্ধিয়া প্ৰায় ৭-৩০ বজাত এই কথা সদৰী কৰাৰ পূৰ্বে এক ঘণ্টাৰ ভিতৰত ঘটনাটো সংঘটিত হৈছিল।
কাৰ্বিয়ে কয়, ‘’যোৱা সপ্তাহত আমেৰিকা যুক্তৰাষ্ট্ৰ পাৰ হোৱা আৰু শনিবাৰে আটলাণ্টিক উপকূলৰ ওচৰত আমেৰিকা যুক্তৰাষ্ট্ৰৰ যুঁজাৰু বিমানৰ দ্বাৰা গুলীয়াই ভূপতিত কৰা বিশাল চীনা বেলুনতকৈ এই বস্তুটো বহুত সৰু আছিল।‘’
তেওঁ কয় যে এইখন “প্ৰায় এখন সৰু গাড়ীৰ আকাৰৰ” আছিল আৰু প্ৰায় ৪০,০০০ ফুট উচ্চতাত উৰি আছিল।
কিৰ্বিয়ে কয়, ‘’ই কানাডাৰ সীমান্তৰ ওচৰৰ উত্তৰ আলাস্কাত হিমায়িত পানীত পৰিছিল আৰু ইয়াক পুনৰুদ্ধাৰ কৰা সম্ভৱ।‘’
তেওঁ কয়, “আমি ধ্বংসাৱশেষ উদ্ধাৰ কৰিবলৈ সক্ষম হ’ম বুলি আশা কৰোঁ, কিয়নো ই কেৱল আমাৰ ভূখণ্ডৰ ভিতৰতেই নহয়, লগতে আমি হিমায়িত পানীত পৰা বুলি ধাৰণা কৰিছো। সেয়েহে ইয়াক পুনৰুদ্ধাৰৰ প্ৰচেষ্টা চলোৱা হ’ব।”
ৰাষ্ট্ৰপতি বিডেনে ইয়াক ভূপতিত কৰাৰ নিৰ্দেশ দিছিল কিয়নো বস্তুটোৱে বিমান চলাচলৰ বাবে “পৰ্যাপ্ত ভাবুকি”ৰ সৃষ্টি কৰিছিল।
কিৰ্বিয়ে কয়, “ইয়াৰ গৰাকী কোন, ৰাষ্ট্ৰ মালিকানাধীন নে কৰ্পোৰেট মালিকানাধীন আমি নাজানো। আমি সম্পূৰ্ণ উদ্দেশ্যটো বুজি পোৱা নাই।”
অৱশ্যে, আমেৰিকা যুক্তৰাষ্ট্ৰৰ সামৰিক বাহিনীয়ে বস্তুটো গুলীবৰ্ষণ কৰাৰ আগতে ইয়াক পৰ্যবেক্ষণ কৰিবলৈ এখন বিমান প্ৰেৰণ কৰিছিল আৰু “পাইলটজনৰ পৰ্যবেক্ষণ মতে ইয়াক নিয়ন্ত্ৰণ কৰিব পৰা হোৱা নাছিল।”
