ভাৰত হৰাৰ পিছতেই ভাহি আহিল গালি-গালাজ; বৈভৱৰ লগতো হতাহতি! দৰাচলতে কি ঘটিছিল?

সোমবাৰে (১৫ জুন) ভাৰত আৰু শ্ৰীলংকাৰ মাজত এদিনীয়া খেল অনুষ্ঠিত হয়। এই খেলখনত ছুপাৰ অভাৰত শ্ৰীলংকাৰ হাতত পৰাস্ত হয় টিম ইণ্ডিয়া। ইতিমধ্যে ভাৰতৰ প্ৰদৰ্শনক লৈ সমালোচনাৰ জোৱাৰ হৈছে। তাৰমাজতে ছ’চিয়েল মিডিয়াত ভাইৰেল হৈ পৰিছে এটা ভিডিঅ’। ইয়াত দেখা গৈছে যে শ্ৰীলংকাৰ ক্ৰিকেটাৰৰ সৈতে বৈভৱ সূৰ্য্যবংশীৰ পায় হতাহতি চলিছে।

ছুপাৰ অভাৰত ভাৰতীয় ক্ৰিকেট দলটোক ১৭ ৰানৰ লক্ষ্য বান্ধি দিয়া হৈছিল। অৱশ্যে টিম ইণ্ডিয়াই ১০ ৰানহে কৰিব পাৰে। বৈভৱে ৩ বলত ৭ ৰান আৰু সূৰ্যাংশ শ্বেডজে ৩ বলত ৩ ৰান সংগ্ৰহ কৰে। এই পৰিস্থিতিত ভাৰতে পৰাজয় স্বীকাৰ কৰিব লগা হৈছিল।

ভাৰতক পৰাস্ত কৰাৰ পিছত শ্ৰীলংকাৰ ক্ৰিকেটাৰসকলে নিজৰ মাজতে এই জয়ৰ উদযাপন কৰিছিল। সূত্ৰৰ মতে, সেই সময়ত শ্ৰীলংকাৰ এজন ক্ৰিকেটাৰে ভাৰতক লৈ বিতৰ্কিত মন্তব্য কৰিছিল। সেই সময়ত বৈভৱ ঠিক সন্মুখত আছিল। টিম ইণ্ডিয়াৰ অপমান তেওঁ একেবাৰেই মানি ল’ব পৰা নাছিল। প্ৰতিবাদ কৰিবলৈ গৈছিল।

তাৰ পিছত দুয়োপক্ষৰ মাজত বাক-বিতণ্ডা আৰম্ভ হ’ল। বৈভৱৰ খং উঠিল। ভিডিঅ’টোত দেখা গৈছে যে বৈভৱে প্ৰথমে শ্ৰীলংকাৰ ক্ৰিকেটাৰ এজনক সামান্য ঠেলি দিছে। এই আচৰণৰ বাবে বৈভৱক কেইবাখনো মেচৰ বাবে নিষিদ্ধ কৰা হ’ব বুলি আশংকা কৰা হৈছে। নিয়ম অনুসৰি ব’ৰ্ডেও তেওঁৰ বিৰুদ্ধে তদন্ত কৰিব পাৰে। যদিও এই সন্দৰ্ভত ব’ৰ্ডে এতিয়ালৈকে কোনো আনুষ্ঠানিক বক্তব্য দিয়া নাই।

ভাৰতীয় ক্ৰিকেট দলটোৱে প্ৰথমে বেটিং কৰিবলৈ নামি ৪৯.২ অভাৰত আটাইকেইটা উইকেট হেৰুৱাই ২৬৫ ৰান সংগ্ৰহ কৰে। এই মেচতো বেটিঙত বৈভৱ সূৰ্য্যবংশী ফ্লপ হয়। তেওঁ ১৪টা বলত মাত্ৰ ২১ ৰানহে কৰে। ইয়াৰ উপৰিও অধিনায়ক তিলক ভাৰ্মাই ৩২টা বলত ২৩ ৰানৰ ইনিংছ খেলিছিল। সৰ্বাধিক স্ক’ৰ লাভ কৰে সূৰ্যাংশ শ্বেডজে। তেওঁ ৬৬টা বলত ৭২ ৰান সংগ্ৰহ কৰে। ইয়াৰ উপৰি বিপ্ৰজ নিগমে ৪৯টা বলত ৫১ ৰান সংগ্ৰহ কৰে।

https://x.com/AbhiMSD_07/status/2066508314482196748?

প্ৰত্যুত্তৰত শ্ৰীলংকাই ৫০ অভাৰত মাত্ৰ ২৬৫ ৰানহে কৰিবলৈ সক্ষম হয়। তাৰ পিছত খেলখন চুপাৰ অভাৰলৈ গ’ল। বৈভৱ সূৰ্যবংশীয়ে এতিয়ালৈকে চলি থকা ত্ৰিদেশীয় ছিৰিজটোত দৃষ্টি আকৰ্ষণ কৰিব পৰা নাই। প্ৰথমখন খেলত ১৪ ৰান, দ্বিতীয়খন খেলত ৪৪ ৰান আৰু এই খেলখনত ২১ ৰান সংগ্ৰহ কৰে। অৰ্থাৎ ৩খন মেচত তেওঁ এটাও ডাঙৰ ইনিংছ খেলিব নোৱাৰিলে।