গণৰাজ্য দিৱসৰ দিনাই কেইবাটাও দল-সংগঠনৰ উদ্যোগত জাতিধ্বংসী নাগৰিকত্ব বিধেয়ক বাতিলৰ দাবীত পাঁচ শতাধিক প্ৰতিবাদকাৰীয়ে উত্তাল কৰি তোলে তিনিচুকীয়া জিলাৰ পেঙেৰী অঞ্চল।
আছু, অসম জাতীয়তাবাদী যুৱ ছাত্ৰ পৰিষদ, আটছা, আছা, মৰাণ ছাত্ৰ সন্থা, ভোজপুৰী পৰিষদকে ধৰি একাধিক সংগঠনৰ লগতে স্থানীয় ৰাইজসহ পাঁচ শতাধিক প্ৰতিবাদকাৰীয়ে ব্ৰহ্মজানৰ পৰা এক প্ৰতিবাদী সমদল বাহিৰ কৰে।
‘আহ ঐ আহ ওলাই আহ, খেদ ঐ খেদ বাংলাদেশী খেদ, বিজেপি চৰকাৰ হায় হায়, প্ৰধান মন্ত্ৰী নৰেন্দ্ৰ মোদী মুৰ্দাবাদ, মুখ্য মন্ত্ৰী সৰ্বানন্দ সোণোৱাল মুৰ্দাবাদ’ আদি শ্ল’গানেৰে উত্তাল কৰি সমদলটোৱে পেঙেৰী থানা হৈ পেঙেৰী চাৰি আলিত উপস্থিত হয়৷
প্ৰতিবাদকাৰী সকলে পেঙেৰী চাৰি আলিত উপস্থিত হৈ বিজেপি বিৰোধী ধ্বনিৰে উত্তাল কৰি বিক্ষোভ প্ৰৰ্দশন কৰি সকলো প্ৰতিবাদকাৰীয়ে একমুখে নাগৰিকত্ব সংশোধনী বিধেয়ক বাতিলৰ দাবী জনায়৷ ইফালে আজিৰ এই প্ৰতিবাদী সমদলৰ সময়ছোৱাত ব্ৰহ্মজান আৰু পেঙেৰী অঞ্চলৰ সকলো ব্যৱসায়িক প্ৰতিষ্ঠান বন্ধ থাকে৷
