মাত্ৰ ৭ বছৰ বয়সত প্ৰথম দেখাদেখি। তাৰ পিছত বয়স বাঢ়ি অহাৰ লগে লগে ইজনে সিজনৰ প্ৰেমত পৰে। ভাৰতীয় ক্ৰিকেট কিংবদন্তি বীৰেন্দ্ৰ ছেহৱাগে বহু অসুবিধাৰ অন্তত সমগ্ৰ পৰিয়ালক পতিয়ন নিয়াই বিবাহপাশত আবদ্ধ হৈছিল। তেওঁৰ পত্নী আৰতি আহলাৱত আছিল ছেহৱাগৰ দূৰ সম্পৰ্কৰ ভগ্নী।
দুয়ো ৩ বছৰ সম্পৰ্কত থকাৰ পিছত ২০০৪ চনত বিয়া হোৱাৰ সিদ্ধান্ত লৈছিল। এইবাৰ সেই সম্পৰ্ক ভাঙিবলৈ ওলাইছে। সংবাদ মাধ্যমৰ বাতৰি যদি শুদ্ধ হয় তেন্তে ২০ বছৰীয়া সম্পৰ্ক ভাঙিবলৈ ওলাইছে। সূত্ৰ অনুসৰি এতিয়া তেওঁলোক পৃথকে পৃথকে বাস কৰি আছে।
ক্ৰিকেটত সৰ্বাধিক দ্ৰুততম ট্ৰিপল শতক অৰ্জন কৰাৰ কৃতিত্ব অৰ্জন কৰিছে বীৰেন্দ্ৰ ছেহৱাগে। ২০০৮ চনত দক্ষিণ আফ্ৰিকাৰ বিৰুদ্ধে টেষ্ট মেচত তেওঁ মাত্ৰ ২৭৮টা বলত ট্ৰিপল শতক অৰ্জন কৰিছিল। সেই ইনিংছত মুঠ ৰান আছিল ৩১৯ ৰান। ইয়াৰে ৪২টা চাৰি আৰু ৫টা ছয় আছিল।
ভাৰতৰ হৈ তেওঁৰ বিধ্বংসী প্ৰদৰ্শন এতিয়াও উল্লেখযোগ্য। ২০০৭ চনত ছেহৱাগ আৰু আৰতিৰ সংসাৰলৈ আহে তেওঁলোকৰ প্ৰথম সন্তান আৰ্যবীৰ। শেহতীয়াকৈ ঘৰুৱা ক্ৰিকেটতো তেওঁ দৃষ্টি আকৰ্ষণ কৰিছে। ছেহৱাগৰ দ্বিতীয় সন্তান বেদান্তৰ জন্ম হৈছিল ২০১০ চনত।
দেৱালীৰ সময়ত যেতিয়া ছেহৱাগে এখন পাৰিবাৰিক ছবি পোষ্ট কৰিছিল, সেই সময়ত মাক আৰু পুত্ৰৰ সৈতে ছেহৱাগক দেখা গৈছিল যদিও পত্নী আৰতিক দেখা পোৱা নগৈছিল। তেতিয়াৰ পৰাই দুয়োৰে মাজৰ সম্পৰ্কক লৈ প্ৰশ্ন উত্থাপন হ’বলৈ ধৰে। অৱশ্যে দুয়োৰে মাজত সম্পৰ্ক বিচ্ছিন্ন হোৱাৰ কোনো ইংগিত তেওঁলোক কোনো এজনে এতিয়াও দিয়া নাই।
