ক্ৰমাৎ ৰহস্যঘন হৈ পৰিছে আৰক্ষী বিষয়া জোনমণি ৰাভাৰ মৃত্যুৰ ঘটনা। সঘনাই উচ্চাৰিত হৈছে জোনমণি ৰাভাৰ প্ৰকৃতে দুৰ্ঘটনাত পতিত মৃত্যু হৈছিল নে কোনোবাই হত্যা কৰি দুৰ্ঘটনাৰ ৰূপ দিছে। নিতৌ ভাইৰেল হৈ থকা ফোন কল ৰেকৰ্ডিং আৰু হঠাতে আবিৰ্ভাৱ হোৱা প্ৰত্যক্ষদৰ্শীৰ মন্তব্যই এই ৰহস্যক অধিক গাঢ়তৰ কৰি তোলাৰ লগতে সংবাদ মাধ্যমতো ব্যাপক চৰ্চা লাভ কৰিছে।
জোনমণি ৰাভাৰ মৃত্যুৰ পাছতে লখিমপুৰৰ নাওবৈচাৰ এগৰাকী মহিলাই সংবাদ মাধ্যমত বিস্ফোৰক অভিযোগ উত্থাপন কৰিছিল।
ইয়াৰ পাছতে প্ৰত্যক্ষদৰ্শী বুলি দাবী কৰা পেচাত চালক প্ৰণৱ দাস নামৰ লোকজনে বুধবাৰে (১৭ মে’) দাবী কৰে যে জোনমণি ৰাভাৰ বাহনখনে ৰখাই থোৱা ট্ৰাকত খুন্দা মৰাৰ ফলতে জোনমণিৰ মৃত্যু হৈছিল। তেওঁ দাবী কৰা মতে জোনমণি ৰাভাৰ বাহনখনৰ পৰা এজন লোক ওলাই গৈছিল।
ইফালে ইয়াৰ বিপৰীত ভাষ্যও প্ৰকাশ পাইছে যে ৰখাই থোৱা আৰক্ষী বিষয়া জোনমণি ৰাভাৰ বাহনখনত তীব্ৰবেগী ট্ৰাকখনেহে খুন্দা মাৰে।
এই দুই ভিন্ন মতে ঘটনাটো ৰহস্যঘন কৰি ৰখাৰ মাজতে ছ’চিয়েল মিডিয়াত ভাইৰেল হৈ পৰিছে দুজন ব্যক্তিৰ মাজত হোৱা এটা কল ৰেকৰ্ডিং।
কল ৰেকৰ্ডিঙত ব্যক্তিজনৰ এজনে জোনমণি ৰাভাৰ হত্য়াকাণ্ডটোক কেনেকৈ ‘দুৰ্ঘটনা’ ৰূপ দিয়া হৈছিল তাক ক্ৰমণুসাৰে বৰ্ণনা কৰা শুনা গৈছে। ঘটনাটো বিৱৰণি দি থকা লোকজনে দাবী কৰে যে দুৰ্ঘটনাটোৰ পূৰ্বে জোনমণি ৰাভাক দুজন লোকে ৰডেৰে মৰিয়াই হত্যা কৰিছিল।
লোকজনৰ দাবী যে, নগাঁও চহৰৰ মাজ মজিয়াতে নিশা ১১.৩০ৰ পৰা ১২.০০ বজাৰ ভিতৰত জোনমণি ৰাভাক হত্যা কৰা হৈছিল। কিন্তু জোনমণি ৰাভাৰ মৃত্যুৰ খবৰ নিশা প্ৰায় ২.১৫ বজাত লাভ কৰা বুলিও প্ৰকাশ কৰিছে লোকজনে।
ইফালে জোনমণি ৰাভাৰ মৃত্য়ুৰ পাছতেই নগাঁও জিলাৰ আৰক্ষী অধীক্ষৰ নেতৃত্বত এটা দলে জোনমণি ৰাভাৰ আৰক্ষী আৱাসত তালাচী চলাইছিল মাতৃৰ সাঁচতীয়া ধনৰ লগতে জোনমণি ৰাভাই থোৱা নগদ ধনো লৈ গৈছিল।
লোকজনে স্পষ্টকৈ কোৱা শুনা গৈছে যে জোনমণি ৰাভাৰ মৃত্যুৰ পূৰ্বে তেওঁৰ লগত হয়বৰগাঁও থানাৰ ভাৰপ্ৰাপ্ত আৰক্ষী বিষয়া আভাজ্যোতি ৰাভাও আছিল।
জোনমণি ৰাভাৰ মৃত্যু ঘটনাৰ সৈতে নগাঁও জিলা আৰক্ষী অধীক্ষৰ লগতে জিলাখনৰ এটা শীৰ্ষ আৰক্ষী দল জড়িত থকা বুলিও দাবী কৰিছে লোকজনে।
কল ৰেকৰ্ডিঙটোত লোকজনে এইটো পূৰ্ব পৰিকল্পিত হত্যাকাণ্ড বুলি দৃঢ়তাৰে কে’বাবাৰো কোৱা শুনা গৈছে। লোকজনে লগতে এই ঘটনাৰ তদন্ত চিবিআইৰ পৰিৱৰ্তে কেন্দ্ৰীয় তদন্তকাৰী সংস্থা (CBI)ৰ হাতত অৰ্পণ কৰা উচিত বুলিও কোৱা শুনা গৈছে। এই কল ৰেকৰ্ডিঙটো ভাইৰেল হোৱাৰ পাছতে সমগ্ৰ ঘটনাটো অধিক ৰহস্যঘন হৈ পৰিছে।
