পশ্চিম বংগৰ মুখ্য মন্ত্ৰী মমতা বেনাৰ্জীয়ে বৃহস্পতিবাৰে কেন্দ্ৰীয় গৃহ মন্ত্ৰী অমিত শ্বাহক সাক্ষাৎ কৰি অসমৰ এন আৰ চিৰ প্ৰসংগ উত্থাপন কৰে।
বুধবাৰে মমতা বেনাৰ্জীয়ে প্ৰধান মন্ত্ৰী নৰেন্দ্ৰ মোদীক সাক্ষাৎ কৰি পশ্চিম বংগৰ নাম বাংলা কৰাৰ বাবে দাবী উত্থাপন কৰাৰ লগতে আন আন ভালেকেইটা গুৰুত্বপূৰ্ণ বিষয় সন্দৰ্ভত আলোচনা কৰে।
অমিত শ্বাহক সাক্ষাৎ কৰি সংবাদ মাধ্যমৰ সৈতে হোৱা মুখামুখিত মমতাই শ্বাহক অসমৰ এন আৰ চি সন্দৰ্ভত এখন পত্ৰ প্ৰদান কৰা বুলিও জনায়।
অসমৰ এন আৰ চি উন্নীতকৰণ প্ৰক্ৰিয়াত বাদ পৰা ১৯ লাখ লোকৰ ভিতৰত বহু সংখ্যক হিন্দী, বেংগলী আৰু গোৰ্খা ভাষা কোৱা প্ৰকৃত ভাৰতীয় ভোটাৰ নাম অন্তৰ্ভূক্ত হৈছে বুলিও অমিত শ্বাহক অৱগত কৰে বুলি কয় মমতা বেনাৰ্জীয়ে।
আনহাতে, পশ্চিম বংগত এন আৰ চি উন্নীতকৰণ সন্দৰ্ভত কোনোধৰণৰ আলোচনা গৃহ মন্ত্ৰীৰ সৈতে হোৱা নাই বুলিও সংবাদ মাধ্যমক জনাই বেনাৰ্জীয়ে।
অসম চুক্তিত এন আৰ চিৰ কথা উল্লেখ কৰা আছে আৰু পৰৱৰ্তী সময়ত উচ্চতম ন্যায়ালয়ৰ পৃষ্ঠপোষকতাত ইয়াক উন্নীতকৰণ কৰা হয় বুলি মত প্ৰকাশ কৰি তেওঁ ইয়াক ভাৰতৰ সকলো ৰাজ্যত প্ৰয়োগ কৰাৰ কোনোধৰণৰ যুক্তি নাই বুলিও কয়।
