পশ্চিম বংগ কংগ্ৰেছৰ অধ্যক্ষ সোমেন মিত্ৰৰ বুধবাৰে নিশা চহৰৰ এখন হাস্পতালত শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স হৈছিল ৭৮ বছৰ।
ব্যক্তিগত চিকিৎসালয়ত ভৰ্তি হৈ থকা মিত্ৰৰ হৃদ তথা বাৰ্ধক্যজনিত কাৰণতেই মৃত্যু হোৱা বুলি এটা সূত্ৰই প্ৰকাশ কৰিছে।
জানিব পৰা মতে, কিছুদিন পূৰ্বে নিয়মীয়া চেকআপ কৰাত তেওঁৰ ক্ৰিয়েটিনিনৰ মাত্ৰা বহু পৰিমানে বৃদ্ধি পোৱাত চিকিৎসকে লগে লগে চিকিৎলায়ত ভৰ্তি কৰাৰ নিৰ্দেশ দিয়ে।
সাধাৰণভাৱে চিকিৎসা চলি থকাৰ মাজতেই বুধবাৰে নিশা প্ৰায় ১.৩০ মান বজাত হৃদৰোগত আক্ৰান্ত হৈ মিত্ৰই মৃত্যুবৰণ কৰে।
মৃত্যুৰ সময়ত তেওঁ পত্নী আৰু একমাত্ৰ পুত্ৰ সন্তানক এৰি থৈ যায়।
পশ্চিম বংগৰ এই গৰাকী নেতাৰ মৃত্যুত দুখ প্ৰকাশ কৰি কংগ্ৰেছৰ সাংসদ গৌৰৱ গগৈয়ে এটা টুইট কৰে।
উল্লেখ্য যে মিত্ৰই ৬০ দশকতে ছাত্ৰ ৰাজনীতিৰ জৰিয়তে কংগ্ৰেছত প্ৰৱেশ কৰিছিল।
মিত্ৰই ২০০৯ বৰ্ষত অনুষ্ঠিত লোকসভা নিৰ্বাচনত তৃণমূল কংগ্ৰেছৰ হৈ নিৰ্বাচন খেলি বিজয়ী হৈছিল।
