ড’নাল্ড ট্ৰাম্প আকৌ আমেৰিকা যুক্তৰাষ্ট্ৰ ৰাষ্ট্ৰপতি নিৰ্বাচিত হৈছে। আমেৰিকাৰ ৰাষ্ট্ৰপতি নিৰ্বাচনে ভাৰতৰ লগতে সমগ্ৰ বিশ্বতে এক উৎকন্ঠাৰ সৃষ্টি কৰিছিল। কোন হ’ব আমেৰিকাৰ ৰাষ্ট্ৰপতি? ট্ৰাম্প নে হেৰিছে? এতিয়া সেই উত্তেজনা আৰু উৎকন্ঠা নাই। এতিয়াৰ প্ৰশ্নটো হ’ল ট্ৰাম্প ৰাষ্ট্ৰপতি হোৱাৰ পিছত আমেৰিকা কোন দিশে গতি কৰিব বা বিশ্ব ৰাজনীতিত ইয়াৰ কি প্ৰভাৱ পৰিব?
ৰাষ্ট্ৰপতি সলনি হোৱাৰ পিছত আমেৰিকাৰ আন্তৰ্জাতিক নীতিৰ কিবা বিশেষ পৰিবৰ্তন হ’ব বুলি ভাবিব নোৱাৰি।এই মুহূৰ্তত বিশ্ব ৰাজনীতিৰ আটাইতকৈ গুৰুত্বপূৰ্ণ ঘটনা কেইটা কি কি? দুখন যুদ্ধ- এখন ৰাচিয়া আৰু উক্ৰইন মাজৰ আৰু আনখন হ’ল ইজৰাইল আৰু পেলাষ্টাইনৰ মাজত হোৱা সংঘৰ্ষ।যদিও হামাচে যোৱা বছৰ ৭ অক্টোৱৰত ইজৰাইল আক্ৰমণ কৰাৰ পিছত ইজৰাইল জাঙুৰ খাই উঠিছে, এতিয়া মধ্য প্ৰাচ্যৰ উত্তেজনাক ইজৰাই পেলাষ্টাইনৰ মাজৰ সংঘৰ্ষ বুলি কোৱাটো এটা ভুল কথা।
এতিয়া ই হৈ পৰিছে দেখ দেখকৈ পেলাষ্টাইনৰ ওপৰত ইজৰাইলৰ এক নিৰ্লজ্জ্য আৰু নৃশংস আক্ৰমণ।আন্তৰ্জাতিক পঢভূমিত ৰাচিয়াৰ ইউক্ৰইন আক্ৰমণ আৰু ইজৰাইলৰ পেলাষ্টাইন আক্ৰমণ- বিশ্বৰ আটাইতকৈ দুটা ডাঙৰ ঘটনা। আকৌ ট্ৰাম্প ৰাষ্ট্ৰপতি হোৱাৰ পিছত আমেৰিকাৰ দুটা আভ্যন্তৰীণ বিষয়ত গুৰুত্বপূৰ্ণ প্ৰভাৱ পৰিব পাৰে। তাৰ এটা হ’ল বিদেশৰ পৰা আহি আমেৰিকাত বসবাস কৰা লোক সকলৰ প্ৰতি লোৱা আমেকিকাৰ নীতি আৰু আনটো হ’ল জলবায়ু পৰিবৰ্তন।
ৰাচিয়া ইউক্ৰাইন যুদ্ধৰ সন্দৰ্ভত এসময়ৰ পুটিনৰ পৰম বন্ধু ট্ৰাম্পে এতিয়া কি ভূমিকা ল’ব।ট্ৰাম্প ৰাষ্ট্ৰপতি নিৰ্বাচিত হোৱাৰ পিছত ৰাচিয়াই কিন্তু এতিয়ালৈ কোনো বিশেষ প্ৰতিক্ৰিয়া প্ৰকাশ কৰা নাই। বৰং ক্ৰেমলিনৰ মুখপাত্ৰ দিমিট্ৰি পেস্কোভে সাংবাদিকসকলৰ আগত কৈছে যে আমেৰিকা ৰাচিয়াৰ “বন্ধু দেশ” নহয় বাবে ৰাষ্ট্ৰপতি ভ্লাদিমিৰ পুটিনে ট্ৰাম্পক অভিনন্দন জনাব নে নজনাই সেই বিষয়েও তেওঁ এতিয়াই একো ক’ব নোৱাৰে।কিন্তু তাৰ বিপৰীতে ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিয়ে কৈছে, ‘বিশ্বত ‘শক্তিৰ জৰিয়তে শান্তি’ স্থাপনৰ নীতিৰ প্ৰতি ৰাষ্ট্ৰপতি ট্ৰাম্পৰ দায়বদ্ধতাক মই আদৰণি জনাওঁ। ই ইউক্ৰেইনলৈ প্ৰকৃত শান্তি আনিব পাৰিব।ৰাষ্ট্ৰপতি ট্ৰাম্পৰ নেতৃত্বত আমেৰিকাও আৰু অধিক শক্তিশালী হ’ব। গতিকে ট্ৰাম্পৰ লগত থকা পুটিনৰ ব্যক্তিগত সম্পৰ্কই ৰাচিয়া আৰু ইউক্ৰেইন যুদ্ধ সম্পৰ্কে ইতিমধ্যে আমেৰিকাই লোৱা দৃষ্টিভংগীৰ কিবা পৰিবৰ্তন হ’ব বুলি কব পৰা নাযায়, অন্ততঃ এতিয়াই।
এতিয়া আহিলোঁ আমি ইজৰাইল পেলাষ্টাইন সম্পৰ্কলৈ। ট্ৰাম্পৰ বিজয়ত ইজৰাইল অতি উচ্ছসিত। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে কৈছে- ‘ইতিহাসৰ শ্ৰেষ্ঠ প্ৰত্যাৱৰ্তনৰ বাবে আপোনালৈ অভিনন্দন! হোয়াইট হাউছলৈ আপোনাৰ ঐতিহাসিক প্ৰত্যাৱৰ্তন আমেৰিকাৰ বাবে এক নতুনযুগৰ আৰম্ভণি আৰু ই ইজৰাইল আৰু আমেৰিকাৰ মাজৰ মিত্ৰতা আৰু অধিক শক্তিশালী কৰিব। নেতানিয়াহুৱে যোয়াভ গেলেণ্টক বৰ্খাস্ত কৰাৰ পিছত মঙলবাৰে প্ৰতিৰক্ষা মন্ত্ৰী হিচাপে নিযুক্তি পোৱা ইজৰাইল কাট্জে কয় যে, “আমি একেলগে আমেৰিকা-ইজৰাইলৰ মিত্ৰতাক শক্তিশালী কৰিম, পণবন্দীসকলক ঘূৰাই আনিম আৰু ইৰাণৰ নেতৃত্বত গঢ়ি উঠা দুষ্ট চক্ৰক পৰাস্ত কৰিবলৈ দৃঢ়তাৰে থিয় দিম” ইজৰাইলৰ এই হৰ্ষোল্লাষৰ বিপৰীতে হামাচৰ বক্তব্য স্বাভাবিকতে শীতল। তেওঁলোকে কৈছে-‘পেলাষ্টানিয়ান জনসাধাৰণৰ অধিকাৰ আৰু ন্যায়ৰ প্ৰতি আমেৰিকা যুক্তৰাষ্ট্ৰ নতুন প্ৰশাসনে কি ভূমিকা গ্ৰহণ কৰে তাৰ ওপৰতহে আমাৰ দৃষ্টিভংগী নিৰ্ভৰ কৰিব।
আমেৰিকাৰ নাগৰিক সকলে গাজাৰ ওপৰত হোৱা আক্ৰমণৰ বিৰোধিতা কৰিছে। নতুন ৰাষ্ট্ৰপতি গৰাকীয়ে তাক গুৰুত্ব দিলেই যথেষ্ঠ।’ এই সন্দৰ্ভত ইৰাণে কি কৈছে সেইটোও প্ৰণিধানযোগ্য।তেওঁলোকে কৈছে, ‘আমেৰিকাৰ নিৰ্বাচনকলৈ আমি ব্যস্ত নহয়।আমাৰ নীতিসমূহ স্থিৰ আৰু কোনো বিশেষ ব্যক্তিৰ ওপৰত নিৰ্ভৰশীল নহয়।আমাৰ মানুহৰ জীৱিকাৰ ওপৰত আমেৰিকাৰ নিৰ্বাচনৰ কোনো প্ৰভাৱ নপৰে।’ ইৰাণৰ বক্তব্য অতি মৰ্যাদাকৰ। ভাৰতৰ প্ৰধানমন্ত্ৰী মোদী ডাঙৰীয়াই ট্ৰাম্পৰ লগত তেখেতৰ বিশেষ সম্পৰ্কৰ কথা কৈ গৌৰৱ কৰে। “এই বিজয়ে আপোনাৰ আগৰ সফলতক সুদৃঢ় কৰিব।বিশ্ব ৰাজনীতিত আমেৰিকা আৰু ভাৰতৰ সহযোগিতা আমি পুনৰাই সুদৃঢ় কৰিবলৈ আগ্ৰহী।’’
বিশ্বৰ কাৰণে আমেকিকাৰ চৰকাৰ সলনিৰ বৰ বিশেষ পাৰ্থক্য নহয়।কিন্তু আমেৰিকাবাসীৰ কাৰণে তাৰ অৰ্থ হয়।আমাৰ ভাৰতত যেনেকৈ হোৱাই নোহোৱাই ভাৰতীয় জনতা পাৰ্টিয়ে ধৰ্মীয় সংখ্যালঘু সকলক দাবী ধমকী দি থাকে আমেকিকাত অন্য দেশৰ পৰা যোৱা মানুহ সকলে এতিয়া ট্ৰাম প্ৰশাসনৰ পৰা তেনে দাবী ধমকীৰ সন্মুখীন হ’ব।গতিকে ট্ৰাম প্ৰশাসন প্ৰবাজিত ভাৰতীয় সকলৰ বাবেও সুখকৰ নহ’ব। কিন্তু ট্ৰাম প্ৰশাসনৰ আটাইতকৈ ভয়াবহ প্ৰভাৱ পৰিব জলবায়ু পৰিবৰ্তনৰ ওপৰত। ট্ৰামে জলবায়ু পৰিবৰ্তনৰ তত্ত্বত বিশ্বাসে নকৰে। গতিকে অহা চাৰি বছৰ বিশ্বৰ পৰিবেশতন্ত্ৰৰ বাবে বৰ বেয়া দিন।আমেৰিকাৰ ৰাষ্ট্ৰপতি নিৰ্বাচনৰ ফলাফল ওলোৱাৰ পিছত বাৰ্নি চেণ্ডাৰ্ছে ডেমক্ৰেটিক পাৰ্টিৰ শ্ৰমিক বিৰোধী স্থিতিক বৰ বেয়াকৈ সমালোচনা কৰিছে। আচলতে হৈছে কি ট্ৰাম্প হৈছে এজন কট্টৰ সোপন্থী নেতা।
গতিকে আমেকিকাৰ আগ্ৰাসী সোপন্থী সকলে ট্ৰাম্পক ভোট দিছে। কিন্তু ডেমক্ৰেটিক পাৰ্টিয়ে শ্ৰমিক সকলৰ জীৱন জীৱিকাৰ সমস্যা সমূহ আওকান কৰা বাবে তেওঁলোক নিজৰ সমাৰ্থক সকলৰ পৰা বিচ্ছিন্ন হৈ পৰিছে। আৰু বিশেষকৈ ৰাষ্ট্ৰপতি জ’বীদেনৰ চৰকাৰে পেলেষ্টাইনত ইজৰাইলে চলোৱা গণহত্যাৰ বাবেও ডেমক্ৰেটিক পাৰ্টিৰ সমৰ্থক সকল পাৰ্টিৰ ওপৰত জকি উঠিছিল। আচলতে ৰিপাল্কিকানে হওক বা ডেমক্ৰেটিকে হওক আমেৰিকাৰ নিৰ্বাচনত এতিয়া গণতন্ত্ৰৰ গ টোও নাই।
এই নিৰ্বাচন হৈছে ধনতন্ত্ৰৰ জুৱা খেল। নিৰ্বাচনত জিকাৰ পিছিত ৰিপাব্লিকান পাৰ্টিৰ সদস্য সকলৰ সমাবেশ এটাত ট্ৰাম্প আৰু তেওঁৰ ঘণিষ্ঠ সমাৰ্থক সকলে যি বক্তৃতাবাজী আৰু আচৰণ কৰিছিল তাৰ পৰা আমেৰিকান নিৰ্বাচনটোক কিবা এটা ডাঙৰ পিকনিক পাৰ্টি যেনহে লাগিছিল। হায় গণতন্ত্ৰ!
