SI কেলেংকাৰীৰ মাষ্টাৰ মাইণ্ড পি কে দত্ত গ্ৰেপ্তাৰ হোৱাক লৈ GMCH ত কলিয়াবৰৰ সাংসদ গৌৰৱ গগৈৰ পৰা প্ৰতিক্ৰিয়া বিচাৰিল সাংবাদিকে।
এই সন্দৰ্ভত প্ৰতিক্ৰিয়া প্ৰকাশ কৰি যুৱ সাংসদগৰাকীয়ে এই কেলেংকাৰীৰ তদন্ত প্ৰক্ৰিয়াক নাটক আখ্যা দিয়ে।
তেওঁ কয় ‘চাওঁক এইবোৰ সকলো নাটক। দিবন ডেকাকো আৰক্ষীয়ে ধৰিছে বুলি কৈছে কিন্তু তেওঁৰ পৰা কি কথানো পোহৰলৈ আহিল? বিজেপি দলটো এটা ৱাশ্বিং মেছিন। কেলেংকাৰীৰ সৈতে জড়িতসকলে বিজেপিত যোগদান কৰি ৰক্ষণাবেক্ষণ পায় আৰু অলপ দিন পাছত তেওঁলোক হিৰ’ হৈ যায়।‘
‘বিজেপিত যোগদান কৰাৰ পাছত ক’লা ৰঙবোৰ মোহাৰি নিকা কৰি দিয়ে। অলপ দিন পাছত চাব সকলো একেই কথা হ’ব।‘ গগৈয়ে লগতে কয়।
ইপিনে এই কেলেংকাৰীৰ ৰিমৰ্ট কন্ট্ৰল উচ্চ স্তৰত থকা বুলি দাবী কৰি গগৈয়ে কয় ‘পি কে দত্ত অসমত থকাৰ সময়তে কাৰোবাৰ হাতত ৰিমোৰ্ট কন্ট্ৰল আছিল। সেই ৰিমোৰ্ট কন্ট্ৰল থকা মানুহজন আমি বিচাৰো।‘
তদুপৰি, পি কে দত্ত কোন বিভাগৰ আছিল বুলি প্ৰশ্ন কৰি গগৈয়ে লগতে কয় ‘তেওঁ আছিল প্ৰাক্তন DIG, গৃহ বিভাগৰ অধীনৰ।‘
ইপিনে, ন্যায়িক বা CBIৰ তদন্তৰ জৰিয়তে গৃহ বিভাগৰ উচ্চ পদস্ত বিষয়াসকলক তদন্তৰ আওতালৈ আনিব লাগে বুলি দাবী কৰে গগৈয়ে।
‘তেতিয়াহে বাস্তৱ সত্য পোহৰলৈ আহিব। আৰক্ষীৰ কেলেংকাৰীৰ লগতে পঞ্চায়ত-গ্ৰামোন্নয়ন বিভাগ, ব্লেক লিষ্টেড ফ্ৰম সকলোতে এক চিণ্ডিকেট চলি আছে।এই চিণ্ডিকেটৰ নিশ্চয়কৈ কোনোবা এটা মাষ্টাৰমাইণ্ড আছে বা ৰিমোৰ্ট কন্ট্ৰ’লাৰ আছে।এই কেলেংকাৰীৰ তদন্ত CIDৰ ওপৰত বিশ্বাস কৰিব নোৱাৰি।‘ গৌৰৱ গগৈয়ে এইদৰে কয়।
ইপিনে, তৃণমূল পৰ্যায়ৰ দুৰ্নীতিকাৰীক গ্ৰেপ্তাৰ কৰিলেও ৰিমোৰ্ট কন্ট্ৰ’ল থকা ব্যক্তিজনে পুনৰ দুৰ্নীতি কৰা আৰম্ভ কৰিব বুলিও গৌৰৱে গুৰুতৰ অভিযোগ তোলে।
‘এই কেলেংকাৰীৰ ৰিমোৰ্ট কন্ট্ৰ’ল মুখ্যমন্ত্ৰীৰ কাৰ্যালয়ত পাব।‘ গৌৰৱ গগৈয়ে দাবী কৰি কয়।
