কৰোনা সংক্ৰমণৰ প্ৰথমটো ঢৌৰ নিয়ন্ত্ৰণত সফল হোৱা বুলি ঢাক-ঢোল বজাই বিশ্বগুৰুৰ স্থান দখলৰ বাবে উদগ্ৰীৱ হৈ পৰা প্ৰধানমন্ত্ৰী নৰেন্দ্ৰ মোদীক এইবাৰ সমগ্ৰ বিশ্বই সমালোচনা কৰা দেখা গৈছে।
কৰোনাৰ দ্বিতীয়টো ঢৌৱে দেশত অভাৱনীয় সংকটৰ সৃষ্টি কৰাৰ সময়তে বিশ্বৰ বিভিন্ন দেশৰ লগতে আন্তঃৰাষ্ট্ৰীয় সংবাদ মাধ্যমেও ভাৰত চৰকাৰৰ ভুল নীতিৰ বাবেই এই পৰিস্থিতিৰ সৃষ্টি হোৱা বুলি দাবী কৰি প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰা দেখা গৈছে।
আনকি বিশ্ব স্বাস্থ্য সংস্থা(WHO)এ দাবী কৰিছে যে কিছুদিন পূৰ্বলৈকে অব্যাহত থকা ৰাজনৈতিক আৰু ধৰ্মীয় সমাৱেশৰ বাবেই ভাৰতত কৰোনাৰ দ্বিতীয়টো ঢৌত সংক্ৰমণ বৃদ্ধি পাইছে।
WHOৰ কৰোনা বিষয়ক সাপ্তাহিক প্ৰত্ৰিকাত কোৱা হৈছে যে ভাৰতত কৰোনাৰ দ্বিতীয় ঢৌৱে সংকটৰ সৃষ্টি কৰাত ৰাজনৈতিক জনসভা আৰু ধৰ্মীয় সমাৱেশৰ বিশেষ ভূমিকা আছে।
প্ৰতিবেদনত লগতে আৰু কোৱা হৈছে যে যোৱা ২০২০ৰ অক্টোবৰৰ প্ৰথমভাগত ভাৰতত কৰোনা ভাইৰাছৰ বি.১.৬১৭ (কৰোনাৰ ভাৰতীয় ৰূপ বুলি পৰিচিত) সন্ধান পোৱা গৈছিল আৰু ইয়াৰ পিছতে ভাৰতত ইয়াৰ সংক্ৰমণ দ্ৰুত হৈছিল।
ডাব্বল মিউটেন্ট হিচাপে চিহ্নিত বি.১.৬১৭ এই ভাইৰাছবিধ দ্ৰুত গতিৰে সংক্ৰমণ ঘটা বুলি জ্ঞাত হোৱাৰ পিছতো ভাৰত চৰকাৰে নিয়ন্ত্ৰণৰ বাবে কোনো পদক্ষেপ গ্ৰহণ নকৰি চৰকাৰে ইখনৰ পিছত সিখন ৰাজনৈতিক নিৰ্বাচনী প্ৰচাৰ সভা আৰু লক্ষ লক্ষ ভক্তৰ উপস্থিতিৰে কুম্ভমেলাৰ আয়োজন কৰিছিল।
এই সমাৱেশসমূহত কোভিড বিধিক চূড়ান্তভাৱে উলংঘা কৰা হৈছিল, সামাজিক দূৰত্ব মানি চলা হোৱা নাছিল। যাৰফলত দেশত কৰোনাৰ দ্ৰুত সংক্ৰমণ বৃদ্ধি পালে বুলি কোৱা হৈছে WHOৰ সাপ্তাহিক প্ৰত্ৰিকাখনত।
আনহাতে ইয়াৰ পূৰ্বে আন্তজাৰ্তিক চিকিৎসা বিষয়ক পত্ৰ লানচেট-ও ভাৰতৰ এই কোভিড পৰিস্থিতিৰ বাবে ৰাজনৈতিক আৰু ধর্মীয় সমাৱেশক দায়ী কৰি প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰিছিল।
