ভাৰতত কৰোনাৰ প্ৰথমটোৰ ঢৌত বয়োবৃদ্ধ লোকৰ আক্ৰান্ত আৰু মৃত্যু হাৰ বেছি হ’লেও দ্বিতীয়টো ঢৌত কিন্তু ইয়াৰ এক বিপৰীত ছবি দেখা গৈছে।
কৰোনাৰ দ্বিতীয়টো ঢৌত দেশৰ যুৱপ্ৰজন্মৰ আক্ৰান্ত বৃদ্ধি পোৱাৰ লগতে মৃত্যুৰ হাৰো বৃদ্ধি পোৱা পৰিলক্ষিত হৈছে।
দেশত ভয়ানক পৰিস্থিতিৰ সৃষ্টি কৰা কৰোনা দ্বিতীয় ঢৌত যুৱপ্ৰজন্মৰ আক্ৰান্ত আৰু মৃত্যুৰ হাৰৰ কাৰকসমূহ সন্ধান কৰি দেশৰ বিজ্ঞানী আৰু স্বাস্থ্য বিশেষজ্ঞসকলে এই সম্পৰ্কীয় কিছুমান কাৰণ প্ৰকাশ কৰিছে।
ইণ্ডিয়ান কাউন্সিল অৱ মেডিকেল ৰিচাৰ্ছ(ICMR)ৰ প্ৰধান ডাঃ বলৰাম ভাৰ্গৱৰ মতে ইয়াৰ প্ৰধান কাৰণ দুটা।
ভাৰ্গৱৰ মতে প্ৰথমটো ঢৌৰ প্ৰভাৱ কমি যোৱাৰ পিছত যুৱপ্ৰজন্মই কোভিড বিধি উলংঘা কৰি বেছিকৈ বাহিৰত ফুৰা-চকা কৰিছিল আৰু সেই সময়ত কোভিডৰ নানা প্ৰজাতিয়ে দেশৰ বিভিন্ন অংশত সক্ৰিয় হৈ উঠিছিল। যাৰ ফলত নতুন প্ৰজাতিৰ কৰোনাত যুৱ প্ৰজন্মৰ আক্ৰান্ত হাৰ পূৰ্বতকৈ বৃদ্ধি পাইছে।
তেওঁ লগতে আৰু কয় যে যে দ্বিতীয় ঢৌত যুৱপ্ৰজন্মৰ সংক্ৰমণৰ হাৰ বেছি হ’লেও প্ৰথম আৰু দ্বিতীয় ঢৌৰ আক্ৰান্তৰ মাজত বয়সৰ বৰ বেছি ব্যৱধান নাই। ভাৰ্গৱৰ মতে ৪০ বছৰৰ ওপৰৰ বয়সৰ আক্ৰান্ত লোকসকলৰ অৱস্থাহে বেছি সংকটজনক হোৱা দেখা গৈছে।
কেন্দ্ৰীয় চৰকাৰৰ তথ্য অনুসৰি ২০২০ চনৰ কৰোনাৰ প্ৰথমটো ঢৌত আক্ৰান্ত ৩১ শতাংশই আছিল ৩০ বছৰ অনুৰ্ধৰ লোক ইয়াৰ বিপৰীতে ২০২১ বৰ্ষৰ এই হাৰ হৈছে ৩২ শতাংশ।
