মদ খাই কৰা অত্যাচাৰ সহিব নোৱাৰি পত্নীয়ে শিৰচ্ছেদ কৰিলে স্বামীৰ; কটা মূৰ মোনাত ভৰাই উপস্থিত হ’ল আৰক্ষী চকীত
মদ খাই প্ৰতিদিনে ঘৰুৱা কথাত অশান্তিৰ সৃষ্টি কৰি অহা বাবে সুৰাপায়ী স্বামীক শিৰচ্ছেদ কৰিলে নিজৰ পত্নীয়ে। পৃথিৱীৰ অন্য প্ৰান্তত নহয় এইখন অসমতে সংঘটিত হৈছে এনে চাঞ্চল্যকৰ ঘটনা।
মঙলবাৰে নিশা লখিমপুৰৰ ধলপুৰৰ কাঠনি গাঁৱত সংঘটিত হয় শিহৰণকাৰী ঘটনাটো। ঘটনাৰ বিৱৰণী অনুসৰি কাঠনি গাঁৱৰ বাসিন্দা বুধিৰাম বৰকটকীয়ে দীৰ্ঘদিন ধৰি সুৰাপান কৰি আহি ঘৰুৱা অশান্তিৰ সৃষ্টি কৰি অহাৰ লগতে সৰু সৰু কথাতে পত্নী-পুত্ৰক মাৰ-পিট কৰাৰ উপৰিও মানসিক নিৰ্যাতন চলাই আহিছিল।
আনদিনাৰ দৰে মঙলবাৰে নিশাও বুধিৰামে মদ্যপান কৰি আহি ঘৰত অশান্তিৰ সৃষ্টি কৰিছিল। প্ৰতিদিনে কৰি অহা এনে অশান্তিত অতিষ্ঠ হৈ তেওঁৰ পত্নী গুনেশ্বৰী বৰকটকীয়ে সেইদিনা মাজনিশা চোকা অস্ত্ৰৰে নিজৰ স্বামী বুধিৰামৰ শিৰচ্ছেদ কৰে।
আনহাতে, স্বামীক শিৰচ্ছেদ কৰি কটা মূৰতো মোনাত ভৰাই মাজৰাতি ধলপুৰ আৰক্ষী চকীত উপস্থিত হৈ গুনেশ্বৰীয়ে আত্মসমৰ্পন কৰি সমষ্ট ঘটনাৰ দোষ স্বীকাৰ কৰে।
দুটা সন্তানৰ মাতৃ গুনেশ্বৰীয়ে ভয়াবহ ঘটনাটো সংঘটিত কৰাৰ সময়ত সেইদিনা ঘৰত দুই পুত্ৰ সন্তান উপস্থিত নাছিল।
বৰ্তমান আৰক্ষীৰ জিম্মাত আছে স্বামীৰ শিৰচ্ছেদ কৰা গুনেশ্বৰী বৰকটকী।