বৃহস্পতিবাৰে অনুষ্ঠিত হোৱা দ্বিতীয় পৰ্য্যায়ৰ নিৰ্বাচনৰ ভোটগ্ৰহণত অসমৰ মঙলদৈ লোকসভা সমষ্টিৰ দলগাঁৱত এগৰাকী মহিলাই পুনৰ ভোট দিয়ে। মহিলাগৰাকীয়ে জোৰকৈ এটা নিৰ্দিষ্ট দলৰ সপক্ষে তেওঁক ভোটদান কৰিবলৈ বাধ্য কৰোৱা বুলি অভিযোগ উত্থাপন কৰাৰ পাছতে পুনৰবাৰ ভোট দান কৰিবলৈ দিয়ে।
মঙলদৈৰ সৰিচাবাৰী ভোটগ্ৰহণ কেন্দ্ৰত ঘটনাটো সংঘটিত হয়। মেলেকা খাতুন নামৰ মহিলাগৰাকীয়ে অভিযোগ কৰাৰ পাছত কেন্দ্ৰটোৰ দায়িত্বত থকা নিৰ্বাচনী বিষয়াসকলে তেওঁক পুনৰ ভোট দিয়াৰ ব্যৱস্থা কৰি দিয়ে।
মাণ্ডলিক বিষয়া জয়ন্ত মেধিয়ে উল্লেখ কৰা অনুসৰি মহিলাগৰাকীক টেন্দাৰ ভোট দিয়াৰ বাবে অনুমতি দিয়া হয়।
নিৰ্দিষ্ট নিয়মৰ ভিত্তিত বেলত পেপাৰত টেন্দাৰ ভোট দিয়া হয় আৰু ভোটটো চিল কৰি বন্ধ বাকচত ভৰাই দিয়া হয়।
দৰং জিলাৰ উপায়ুক্তগৰাকীয়ে এতিয়ালৈ ঘটনাটো সন্দৰ্ভত ভোটগ্ৰহণ কেন্দ্ৰটোৰ পৰা কোনোধৰণৰ অভিযোগ অহা নাই বুলি উল্লেখ কৰে। দুই এটা সৰু সুৰা বেমেজালিক বাদ দিলে মঙলদৈ লোকসভা সমষ্টিৰ নিৰ্বাচন শান্তিপুৰ্ণ ভাবে সামৰণি পৰে।
২৩ মে’ত লোকসভা নিৰ্বাচনৰ ফলাফল ঘোষণা কৰিব। তাৰ পূৰ্বে অসমত তৃতীয় তথা অন্তিম পৰ্য্যায়ত বৰপেটা, ধুবুৰী, গুৱাহাটী আৰু কোকৰাঝাৰ সমষ্টিত নিৰ্বাচন অনুষ্ঠিত হ’ব।
