চলিত মাহৰ আৰম্ভণিতে দেশৰ ৰাজধানী দিল্লিত সংঘটিত এক ঘটনাই ব্যাপক চাঞ্চল্যৰ সৃষ্টি কৰিছিল। এখন ৫ ষ্টাৰ বিলাসী হোটেলত ৫ লক্ষাধিক টকাৰ বিল পৰিশোধ নকৰাকৈ পলায়নৰ চেষ্টা কৰিছিল এগৰাকী মহিলাই।
দিল্লী বিমানবন্দৰৰ সমীপৰ পুলমেন নামৰ এখন বিলাসী হোটেলত দুসপ্তাহতকৈও অধিক সময় আছিল অন্ধ্ৰ প্ৰদেশৰ ঝান্সি ৰাণী চেমুৱেল নামৰ মহিলাগৰাকী। যোৱা ৩০ ডিচেম্বৰতে হোটেলখনত চেক ইন কৰিছিল তেওঁ।
চেমুৱেলে হোটেলখনত ভুৱা পৰিচয় ব্যৱহাৰ কৰি আন আন সুবিধাৰ লগতে স্পাৰ সুবিধা পৰ্যন্ত ব্যৱহাৰ কৰিছিল। কেৱল স্পাৰ বাবেই তেওঁৰ নামত ২ লাখতকৈ অধিক টকাৰ বিল হৈছিল।
নিজকে চিকিৎসক বুলি দাবী কৰি চেমুৱেলে তেওঁৰ স্বামীও চিকিৎসক আৰু নিউয়ৰ্কত থাকে বুলি উল্লেখ কৰিছিল। হোটেলখনৰ মেনেজাৰৰ অভিযোগ অনুসৰি, চেমুৱেলে বেংকৰ ইউপিআই এপৰ সহায়ত তেওঁৰ একাউণ্টৰ পৰা ধন ট্ৰেন্সফাৰ কৰা বুলি দাবী কৰিছিল।
কিন্তু তাৰ পিছতো হোটেলখনৰ বেংক একাউণ্টত কোনো ধৰণৰ পেমেণ্ট পোৱা নাই বুলি কৰ্তৃপক্ষই উল্লেখ কৰে। হোটেলৰ কৰ্মচাৰীসকলে তেওঁক বাৰে বাৰে বাধা আৰোপ কৰাৰ পিছতো চেমুৱেলে হোটেলৰ পৰা বেগ লৈ পলায়নৰ চেষ্টা কৰিছিল।
ইয়াৰ পিছতে হোটেল কৰ্তৃপক্ষই ঘটনা সন্দৰ্ভত আৰক্ষীৰ ওচৰত অভিযোগ দাখিল কৰে। এই অভিযোগৰ আধাৰত আৰক্ষীয়ে চেমুৱেলক প্ৰথমে আটক কৰে যদিও পিছত তদন্তত সহযোগ নকৰাৰ বাবে তেওঁক গ্ৰেপ্তাৰ কৰে।
এই ঘটনাৰ তদন্তত সম্প্ৰতি পোহৰলৈ আহিছে এক বিশেষ তথ্য। হোটেলখনত প্ৰতাৰণাৰ চেষ্টা চলাই গ্ৰেপ্তাৰ হোৱা মহিলাগৰাকীৰ বেংক একাউণ্টত মাত্ৰ ৪১ টকাহে আছিল বুলি আৰক্ষীয়ে জানিবলৈ দিছে।
সংবাদ মাধ্যমত প্ৰকাশিত খবৰ অনুসৰি, মহিলাগৰাকীয়ে ধন পৰিশোধৰ বাবে ব্যৱহাৰ কৰা এপটো সন্দেহজনক আছিল বুলি আৰক্ষীয়ে সন্দেহ প্ৰকাশ কৰিছে। ঘটনা সন্দৰ্ভত তদন্ত অব্যাহত আছে বুলি আৰক্ষীয়ে লগতে প্ৰকাশ কৰিছে।
