উচ্চতা ১৫,২৫৬ ফুট, ভোটাৰ ৫২ গৰাকী: বিশ্বৰ সৰ্ব্বোচ্চ ভোটকেন্দ্ৰত আজি ভোটগ্ৰহণ
আজি অনুষ্ঠিত হৈছে হিমাচল প্ৰদেশৰ বিধানসভা নিৰ্বাচন। ৰাজ্যখনৰ ৫৫ লাখতকৈও অধিক ভোটাৰে আজি নতুন চৰকাৰ নিৰ্বাচনৰ বাবে ভোটদান কৰিব। নিৰ্বাচনৰ বাবে নিৰ্বাচন আয়োগে দূৰৱৰ্তী অঞ্চলত তিনিটা অস্থায়ী ভোটকেন্দ্ৰকে ধৰি ৭,৮৮৪ টা ভোটকেন্দ্ৰ ৰাজ্যখনত স্থাপন কৰিছে।
ভোটগ্ৰহণৰ বাবে লাহৌল আৰু স্পিতিৰ তাছিগাঙত স্থাপন কৰা হৈছে এটা বিশেষ ভোটকেন্দ্ৰ। এই ভোটকেন্দ্ৰটোৰ বিশেষত্ব হৈছে, ই মুঠ ১৫,২৫৬ ফুট উচ্চতাৰে বিশ্বৰ সৰ্ব্বোচ্চ ভোটগ্ৰহণ কেন্দ্ৰ হিচাপে বিবেচিত হৈছে। মুঠ ৫২ গৰাকী ভোটাৰে এই ভোটকেন্দ্ৰত ভোটদান কৰিব।
মূলত: জ্যেষ্ঠ নাগৰিক আৰু বিশেষভাৱে সক্ষম ভোটাৰসকলৰ বাবে ভোটদান সহজ কৰি তুলিবলৈ তাছিগাঙৰ এই ভোটকেন্দ্ৰটোক মডেল ভোটকেন্দ্ৰ হিচাপে গঢ়ি তোলা হৈছে।
Tashigang (Lahaul&Spiti ), has world’s highest polling station at 15,256 ft & 52 registered voters, is set to retain its record of 100% voter turnout in the Nov 12 assembly election. It has been made Model Polling station to make voting easy for senior citizens & disabled voters. pic.twitter.com/SJcw86Z3lL
— CEO Himachal (@hpelection) November 12, 2022
ৰাজ্যখনৰ বৰ্তমানৰ মুখ্যমন্ত্ৰী জয়ৰাম ঠাকুৰ, প্ৰাক্তন মুখ্যমন্ত্ৰী বীৰভদ্ৰ সিঙৰ পুত্ৰ বিক্ৰমাদিত্য সিঙকে ধৰি মুঠ ৪১২ গৰাকী প্ৰাৰ্থীয়ে মুঠ ৬৮ টা সমষ্টিৰ নিৰ্বাচনত প্ৰতিদ্বন্দিতা আগবঢ়াইছে।
উল্লেখ্য যে ৰাজ্যখনত মূলত: বিজেপি আৰু কংগ্ৰেছৰ মাজতে মূল নিৰ্বাচনী যুঁজ হ’ব। বিগত ২০১৭ চনৰ নিৰ্বাচনত বিজেপিয়ে ৪৪ খন আসন দখলেৰে চৰকাৰ গঠন কৰাৰ বিপৰীতে কংগ্ৰেছে লাভ কৰিছিল ২৬ খন আসন।
এইবাৰো বিজেপিয়ে পুনৰ ৰাজ্যখনত চৰকাৰ গঠনৰ প্ৰবল দাবীদাৰ বুলি গণ্য কৰা হৈছে। অৱশ্যে কংগ্ৰেছেও নিজৰ হেৰুওৱা শক্তি ঘূৰাই পোৱাৰ আশাৰে এইবাৰ প্ৰতিদ্বন্দিতা আগবঢ়াইছে।
৮ ডিচেম্বৰত অনুষ্ঠিত হ’বলগীয়া ভোটগণনাই হিমাচল প্ৰদেশত এই দুই প্ৰধান ৰাজনৈতিক দলৰ ভাগ্য নিৰ্ণয় কৰিব।