ক’ৰ’না ভাইৰাছৰ সংক্ৰমণ ৰোধ কৰাৰ বাবে প্ৰধান মন্ত্ৰী নৰেন্দ্ৰ মোদীয়ে সমগ্ৰ দেশত ২১ মাৰ্চৰ পৰা ২১ দিনৰ বাবে ল’কডাউন ঘোষণা কৰাৰ পাছত দেশৰ লগতে অসমতো ল’কডাউন সম্পূৰ্ণ ৰূপে পালন কৰাৰ বাবে ৰাইজক সজাগ কৰি তোলাৰ ক্ষেত্ৰত বিশেষ ভূমিকা পালন কৰিছে অসম আৰক্ষীয়ে।
নলবাৰী আৰক্ষীয়েও ল’কডাউন যাতে ৰাইজে সফলভাৱে পালন কৰে সেয়া নিশ্চিত কৰাৰ বাবে কৰ্তব্যত নিয়োজিত হৈ আছে।
নলবাৰী চহৰত নতুনকৈ প্ৰতিষ্ঠা লাভ কৰা খাদ্য বিপনী ডেলিনাদা (Delinada)ই নলবাৰী চহৰত কৰ্তব্যৰত আৰক্ষী, অৰ্ধসামৰিক বাহিনীৰ জোৱান সকলৰ বাবে পেকেট লাঞ্চ আৰু খোৱা পানীৰ বটল আগবঢ়াই আৰক্ষীৰ দায়িত্বৰ সলাগ লয়।
আনহাতে, কৰ্তব্যৰত আৰক্ষীৰ লোকসকলেও ডেলিনাদাৰ এই ব্যতিক্ৰমী পদক্ষেপৰ বাবে আন্তৰিক অভিনন্দন জ্ঞাপন কৰে।
‘‘সমাজৰ প্ৰতি অৱদান আগবঢ়োৱা আমাৰ এক সপোন আছিল। ভৱিষ্যতে আমি আমাৰ সামাজিক দায়বদ্ধতাৰ বাবে পৃথকৈ কাম কৰাৰ বাবেও পৰিকল্পনা গ্ৰহণ কৰিছো,’’ ডেলিনাদাৰ স্বত্তাধিকাৰী মৃদুল কলিতাই এইদৰে কয়।
তদুপৰি, ল’কডাউনৰ বাবে নতুনকৈ আৰম্ভ কৰা ব্যৱসায় কিছু পৰিমাণে ক্ষতিগ্ৰস্তু হৈছে যদিও প্ৰধান মন্ত্ৰীয়ে ঘোষণা কৰা ল’কডাউনক মৃদুলে আদৰণি জনাই সকলোকে ঘৰৰ ভিতৰত আৱদ্ধ হৈ থাকি সু-নাগৰিকৰ দায়িত্ব পালন কৰিবলৈ অনুৰোধ কৰে।
