‘’সিহঁতৰ ভুল হৈছিল, শাস্তিও পালে। ফেইচবুকৰ দৰে ছ’চিয়েল মিডিয়াৰ ভালদৰে ব্যৱহাৰ কৰিব লাগে। সিহঁত সৰু ল’ৰা,মোৰ ভাইৰ দৰে। সেয়ে,ক্ষমা কৰি দিলোঁ।’’
প্ৰায় দুবছৰ আগেয়ে ফেইচবুকৰ জৰিয়তে হত্যাৰ ভাবুকি দিয়া দুজন যুৱকক বৃহস্পতিবাৰে ডিব্ৰুগড়ৰ সত্ৰ ন্যায়াধীশৰ আদালতত হাজিৰ হৈ জনপ্ৰিয় শিল্পী জুবিনে এইদৰে মন্তব্য কৰাৰ লগতে তেওঁলোকক ক্ষমা কৰি দিয়ে।
কেৱল সেয়াই নহয়, নাইন এম এম পিষ্টলেৰে গুলীয়াই হত্যাৰ ভাবুকি দিয়া যুৱক দুজনক নিজৰ ঘৰলৈ আমন্ত্ৰণো জনাই থৈ গ’ল জুবিনে।
উল্লেখযোগ্য যে ২০১৭ চনৰ ২২ এপ্ৰিলত ডিব্ৰুগড়ৰ চৌকিডিঙ্গি খেলপথাৰত অনুষ্ঠিত বিহু সন্মিলনত অনুষ্ঠান পৰিৱশন কৰিবলৈ অহা জুবিনক যুৱক দুজনে ছ’চিয়েল মিডিয়াৰ জৰিয়তে দহ মিটাৰ দূৰত্বৰ পৰা নাইন এম এম পিষ্টলেৰে গুলীয়াই হত্যা কৰাৰ ভাবুকি দিছিল।
ইয়াৰ পাছত এই ঘটনাক লৈ সৃষ্টি হোৱা চাঞ্চল্যৰ মাজতে কঠোৰ নিৰাপত্তাৰ মাজত জুবিনে অনুষ্ঠান পৰিৱেশন কৰে। এই ঘটনাৰ এদিন পাছতে ডিব্ৰুগড় আৰক্ষীয়ে এটা গোচৰ ৰুজু কৰে।
আৰক্ষীয়ে জি আৰ ১২৯৮/১৭,১২(বি)৩৮৭/৫০৬ নম্বৰৰ গোচৰ পঞ্জীয়ন কৰি টুলটুল বাগলাৰী ওৰফে কাই খাপলাং আৰু মুকুল গগৈ ওৰফে মুকুল আহোম শিৱসাগৰীয়া নামৰ যুৱক দুজনক গ্ৰেপ্তাৰ কৰি জে’ললৈ প্ৰেৰণ কৰে।
গোচৰটোত জুবিন গাৰ্গক সাক্ষী হিচাপে বিচৰা হৈছিল আৰু সেই অনুসৰি বৃহস্পতিবাৰে জুবিন ডিব্ৰুগড়ৰ সত্ৰ ন্যায়াধীশৰ আদালতত হাজিৰ হয়।
আদালতত হাজিৰ হোৱাৰ সময়তে অধীৰ আগ্ৰহেৰে অপেক্ষা কৰি ৰৈ থকা অধিবক্তাসকলে জুবিনৰ সৈতে ছেলফি ল’বলৈ হেতা ওপৰা লগায়। অধিবক্তাসকলে আনকি জুবিনক বাৰ এছোচিয়েশ্যনৰ কক্ষলৈ মাতি সম্বৰ্দ্ধনাও জনায়।
