পাঁচজনকৈ শাসনাধিষ্ঠিত কংগ্ৰেছী বিধায়কৰ লগতে মুঠ আঠজন বিধায়কে নৱ গঠিত এন পি পিত যোগদান কৰিবলৈ ওলোৱাটোৱে বেচ উৎসাহী কৰি তুলিছে দলটোৰ সভাপতি কনৰাড চাংমাক। আনকি অহা নিৰ্বাচনৰ পিছত এন পি পি দলে চৰকাৰ গঠন কৰিব বুলিও এক প্ৰকাৰৰ ভৱিষ্যদ্বাণী কৰিছে চাংমাই। ‘আঠজনকৈ বিধায়কে পদত্যাগ কৰাটোৱে ইংগিত কৰিছে যে তেওঁলোকে মুকুল চাংমাৰ নেতৃত্বৰ ওপৰত আস্থা হেৰুৱাইছে।’ কনৰাড চাংমাই কালি দলৰ মুখ্য কাৰ্য্যালয়ত এইদৰে কয়।
উল্লেখযোগ্য যে অহা ৪ জানুৱাৰিত প’ল’ গ্ৰাউণ্ডত হ’ব লগীয়া সমাৱেশত এই আঠজন বিধায়কে নেশ্যনেল পীপলছ পাৰ্টিত যোগদান কৰাৰ কথা। কনৰাডে কোৱামতে ৬০ জনীয়া বিধানসভাৰ প্ৰায় ১২ শতাংশ প্ৰতিনিধি দলটোলৈ অহাটোৱে দলটোৰ মনোবল নেতা-কৰ্মীসকলৰ বৃদ্ধি কৰিছে। তেওঁ কয় যে বিধায়কসকলৰ তৃণমূল পৰ্য্যায়ৰ লোকসকলৰ সৈতে সম্পৰ্ক আছে আৰু তেওঁলোকে ভোটাৰৰ আৱেগ-অনুভূতি ভালদৰে বুজি পায়। সেয়ে তেওঁলোকে পদত্যাগ কৰিছে। ‘তৃণমূল পৰ্য্যায়ৰ পৰা মতামত লোৱাৰ পিছতহে তেওঁলোকে এন পি পিত যোগদান কৰিছে, কাৰণ তেওঁলোকে জানে যে এইটোৱে একমাত্ৰ বিকল্প।’ কনৰাডে কয়। তেওঁ নিৰ্বাচনৰ ফলাফল পূৰ্বানুমান বৰ জটিল বুলি কোৱাৰ পিছতো দাবী কৰে যে এন পি পি একক সংখ্যাগৰিষ্ঠ দল হিচাপে থিয় হ’বলৈ সক্ষম হ’ব।
আনহাতে আন এটা মন্তব্যত কনৰাডে কয় যে দল হিচাপে এন পি পিৰ এটা নিজা মতাদৰ্শ আছে। তেওঁলোকে আটাইকেইটা সমষ্টিতে প্ৰাৰ্থী থিয় কৰাব। ‘আমি ৰাজ্যখনৰ আটাইকেইটা সমষ্টিতে প্ৰাৰ্থী থিয় কৰাম। আমি বিজেপিৰ এ বা বি টিম নহয়। আমি নিজৰ জোৰত নিৰ্বাচন খেলিম। তাৰ অৰ্থ এয়ে যে আমাৰ বিজেপিৰ সৈতে কোনো মিত্ৰতা নাই।’ তেওঁ কয়।
বিজেপিৰ সৈতে নিৰ্বাচনৰ পিছত তেওঁলোকে মিত্ৰতা কৰাৰ সম্ভৱনা আছে নেকি বুলি সোধা এটা প্ৰশ্নৰ উত্তৰত কয়, ‘প্ৰথমে নিৰ্বাচনৰ বৈতৰণী পাৰ হৈ ল’বলৈ দিয়ক। আমি পৰৱৰ্তী চৰকাৰখন গঠন কৰিব পৰাকৈ প্ৰয়োজনীয় সংখ্যক আসন পাম বুলি আশাবাদী।’
উল্লেখযোগ্য যে দলটোৰ সভাপতি কনৰাড চাংমাই মুখেৰে অস্বীকাৰ কৰিলেও দলটোৰ বিজেপিৰ সৈতে বুজাবুজি থকা বুলি ইতিপূৰ্বে জনাজাত হৈছে। মণিপুৰত দলটোৱে বিজেপিৰ সৈতে চৰকাৰ গঠনত অংশগ্ৰহণ কৰিছে। আনকি দলটোৱে মেঘালয়ত ‘হিন্দু পাৰ্টি’ হিচাপে প্ৰচাৰৰ প্ৰয়াস কৰাও দেখা গৈছে।
আনহাতে মুখ্য মন্ত্ৰী মুকুল চাংমাই কৈছে যে বিধায়ককেইজনৰ দলত্যাগে দলত তথা অহা নিৰ্বাচনত কোনো ধৰণৰ প্ৰভাৱ নেপেলায়।
