ৰাজ্যখনত উন্নীতকৃত হৈ থকা নাগৰিকপঞ্জীৰ প্ৰথমখন খচৰাত নাম বাদ পৰা ভাৰতীয় নাগৰিকসকলে আগ্ৰহ তথা উৎকণ্ঠাৰে অপেক্ষা কৰি আছে দ্বিতীয় তথা চূড়ান্ত খচৰা প্ৰকাশ পোৱালৈ। কেতিয়া এই দ্বিতীয় খচৰা প্ৰকাশ পাব সেই সম্পৰ্কত উচ্চতম ন্যায়ালয়ৰ পৰা তথা ৰাষ্ট্ৰীয় নাগৰিকপঞ্জী উন্নীতকৰণ কৰ্তৃপক্ষৰ পৰা একো স্পষ্ট ঘোষণা অহা নাই যদিও অহা ১৫ ফেব্ৰুৱাৰিৰ পৰা আৰম্ভ হ’ব এন আৰ চিৰ প্ৰ-পত্ৰৰ অন্তিম পৰ্যায়ৰ বংশবৃক্ষ পুনৰীক্ষণ। চৰকাৰৰ এটা সূত্ৰই জানিবলৈ দিয়া মতে এমাহৰ ভিতৰত, অৰ্থাৎ ১৫ ফেব্ৰুৱাৰিৰ পৰা ১৫ মাৰ্চৰ ভিতৰত এন আৰ চিৰ প্ৰ-পত্ৰৰ বংশবৃক্ষৰ পুনৰীক্ষণৰ প্ৰক্ৰিয়া সম্পূৰ্ণ হ’ব।
উল্লেখযোগ্য যে প্ৰথম খচৰাত প্ৰায় ২ কোটি লোকৰ নাম অন্তৰ্ভুক্ত হৈছিল যদিও বহু সংখ্যক নাগৰিকৰ নাম বাদ পৰাত জনসাধাৰণৰ মাজত চূড়ান্ত অসন্তুষ্টি দেখা পোৱা গৈছিল। আনকি একেটা পৰিয়ালৰ নাম আংশিক ৰূপতহে অন্তৰ্ভুক্ত হৈছিল প্ৰথম খচৰাত।
এন আৰ চি কৰ্তৃপক্ষ তথা চৰকাৰে এইসকল লোকক শংকিত নহ’বলৈ আৰু দ্বিতীয় খচৰাত প্ৰকাশ হোৱালৈ অপেক্ষা কৰিবলৈ আহ্বান জনাইছিল।
জানিব পৰামতে দ্বিতীয় খচৰাৰ কাম খৰতকীয়া কৰিবৰ বাবে ৩০ জানুৱাৰিত দেশৰ মহাপঞ্জীয়ক শ্ৰী শৈলেশে এন আৰ চিৰ ৰাজ্যিক সমন্বয়ক প্ৰতীক হাজেলাৰ সৈতে ৰাজ্যৰ বিভিন্ন জিলাৰ উপায়ুক্তসকলৰ লগত দিচপুৰত এখন গুৰুত্বপূৰ্ণ বৈঠকত মিলিত হয়।
সূত্ৰটোৱে কয় যে বিভিন্ন জিলাৰ উপায়ুক্তসকলক গুৱাহাটীৰ ভঙাগড়স্থিত এন আৰ চিৰ কাৰ্যালয়ত বংশবৃক্ষ পুনৰীক্ষণ সন্দৰ্ভত প্ৰশিক্ষণ প্ৰদান কৰা হয়। অহা ৩১ জানুৱাৰি আৰু ১ ফেব্ৰুৱাৰি ধৰি এই প্ৰশিক্ষণ চলি থাকিব।
৩১ জানুৱাৰিত এন আৰ চিৰ সৈতে জড়িত ৰাজ্যৰ বিভিন্ন জিলাৰ উপায়ুক্তসকলক আৰু বৃহস্পতিবাৰে এল আৰ চি আৰ সকলক এন আৰ চিৰ কাৰ্যালয়ত এই প্ৰশিক্ষণ দিয়া হ’ব।
উল্লেখযোগ্য যে অহা ২০ ফেব্ৰুৱাৰিত উচ্চ ন্যায়ালয়ে এন আৰ চি সম্পৰ্কীয় পৰৱৰ্তী শুনানি গ্ৰহণ কৰিব।
