কংগ্ৰেছে ৰাজনৈতিক মুনাফা লাভৰ বাবে নাগৰিকত্ব সংশোধনী বিধেয়কখনক কেন্দ্ৰ কৰি ৰাজ্যত বিজেপিৰ বিৰুদ্ধে উঠা জনজাগৰণৰ ঢৌক সময়োপযোগী ব্যৱহাৰৰ কৰিলেও দলটোক অস্বস্তিত পেলাইছে কেইবাজনো বাঙালী নেতা-বিধায়ক-সাংসদে।
জানিব পৰামতে, বিধেয়কখন সন্দৰ্ভত জনমত সংগ্ৰহৰ বাবে গঠন কৰি দিয়া যুটীয়া সংসদীয় কিমিটীৰ সদস্য তথা নিখিল ভাৰত মহিলা কংগ্ৰেছৰ সভানেত্ৰী সাংসদ সুস্মিতা দেৱ, উত্তৰ কৰিমগঞ্জৰ কংগ্ৰেছী বিধায়ক কমলাক্ষ দেব, প্ৰাক্তন কংগ্ৰেছী মন্ত্ৰী গৌতম ৰয়ে বিধেয়কখনৰ সমৰ্থন কৰিছে। কমলাক্ষ দেবে সংবাদ মাধ্যমৰ আগত ‘ধৰ্মৰ ভিত্তিত নহয়, অন্য দেশৰ পৰা নিৰ্যাতিত হৈ ভাৰতলৈ অহা সকলোকে নাগৰিকত্ব দিয়াৰ পক্ষত আছো’ বুলি কৌশলী মন্তব্য কৰে।
আনহাতে ব্ৰহ্মপুত্ৰ উপত্যকাতো হোজাইৰ কংগ্ৰেছী নেতা তথা প্ৰাক্তন কংগ্ৰেছী মন্ত্ৰী ডাঃ অৰ্ধেন্দু কুমাৰ দে’ই নাগৰিকত্ব সংশোধনী বিধেয়কখনৰ সমৰ্থন কৰাই নহয়, বিভিন্ন উচটনিমূলক বক্তব্য অব্যাহত ৰাখিছে, যিবোৰ মন্তব্যই অসমত ভাষিক বিভাজন তথা অসমীয়া-বাঙালীৰ সংঘাত তীব্ৰতৰ কৰি তুলিব পাৰে।
আনহাতে, কংগ্ৰেছ দলটোৱে এই বিষয়টোত এতিয়ালৈকে বিধেয়কখন সমৰ্থন কৰা আটাইকেইজন নেতাৰ পৰা দূৰত্ব বজাই ৰাখিছে। দলৰ পৰা এই নেতাসকলৰ মতক ‘ব্যক্তিগত’ আখ্যা দিয়াৰ লগতে বিধেয়কখনৰ স্পষ্ট বিৰোধিতাৰ যি দলীয় স্থিতি সি অটুট আছে বুলি কোৱা হৈছে।
অৱশ্যে বিধেয়কখন সন্দৰ্ভত কেৱল কংগ্ৰেছেই যে দলৰ মজিয়াৰ পৰা মতবিৰোধৰ সন্মুখীন হৈছে, সেয়া নহয়। বিজেপিতো আগশাৰীৰ নেত্ৰী মীৰা বৰঠাকুৰে দলীয় স্থিতিৰ বিপৰীতে গৈ অসমীয়া ভাষা-সংস্কৃতি-জাতিৰ স্বাৰ্থত থিয় হৈ বিধেয়কখনৰ বিৰোধিতা কৰিছে। একেদৰে চৰকাৰৰ অংশীদাৰ দল হৈয়ো অগপই বিধেয়কখনৰ বিৰোধিতা কৰিছে।
