উত্তৰ-পূবৰ অন্যতম ৰাজ্য নাগালেণ্ডৰ ৰাজধানী কহিমাত আৰম্ভ কৰা হৈছে আধাৰ কাৰ্ড পঞ্জীয়নৰ কাম। এই সন্দৰ্ভত কহিমাৰ ডাক সেৱা বিভাগৰ সঞ্চালকালয়ে জনসাধাৰণক অৱগত কৰি কয় যে চহৰখনত আধাৰ কাৰ্ড পঞ্জীয়নৰ কাম-কাজ আৰম্ভ কৰা হৈছে আৰু উপযুক্ত তথ্য-পাতি জমা দি ৰাইজে এই সুবিধা গ্ৰহণ কৰিব পাৰিব।
উল্লেখ্য যে জনসাধাৰণে সদ্যহতে কহিমাৰ মুখ্য ডাকঘৰ, মন ডাকঘৰ, টুৱেনছাঙ ডাকঘৰ আৰু জুনহেবটো ডাকঘৰত আধাৰ কাৰ্ডৰ প্ৰ-পত্ৰ লাভ কৰিবলৈ সক্ষম হ’ব।
নাগালেণ্ড সংমণ্ডলৰ ডাকঘৰ সেৱাৰ সঞ্চালক আৰ এম পেটেলে প্ৰকাশ কৰা অনুসৰি কেৱল ৰাজ্যখনৰ স্থায়ী বাসিন্দা সকলেহে আধাৰ কাৰ্ড লাভ কৰিবলৈ সক্ষম হ’ব। অৱশ্যে এই ক্ষেত্ৰত চৰকাৰী চাকৰিয়াল সকলক ৰেহাই দিয়া হ’ব।
প্ৰসংগক্ৰমে উল্লেখযোগ্য যে স্থায়ী বাসিন্দাৰ প্ৰমাণ পত্ৰ, অনুসূচীত জাতিৰ প্ৰমাণ পত্ৰ, খিলঞ্জীয়াৰ প্ৰমাণ পত্ৰ আদি দাখিলৰ জৰিয়তে ৰাইজে আধাৰ কাৰ্ড পঞ্জীয়ন কৰিবলৈ সক্ষম হ’ব।
আধাৰ কাৰ্ড পঞ্জীয়নৰ কাম ক্ষিপ্ৰ গতিৰে সমাপ্ত কৰিবলৈ কেন্দ্ৰীয় চৰকাৰে সংশ্লিষ্ট সকলো ৰাজ্যকে নিৰ্দেশ দিয়াৰ পাছত নাগালেণ্ড চৰকাৰৰ এই তৎপৰতা লক্ষণীয়। ইয়াৰ জৰিয়তে পাহাৰীয়া ৰাজ্যখনৰ ৰাইজে আধাৰ কাৰ্ড পঞ্জীয়নৰ সুবিধা লাভ কৰিবলৈ সক্ষম হ’ব।
