গুৱাহাটীৰ দুৱাৰডলিতে আমিনগাঁৱত থকা ‘চিলাৰায় উদ্যান’ত স্বয়ং ট্ৰেফিক আৰক্ষীয়ে অবৈধভাৱে নিৰ্মাণ কৰা আৰক্ষী চকীটো উঠাই নিবলৈ নিৰ্দেশ দিছে গুৱাহাটী উচ্চ ন্যায়ালয়ে।
স্বয়ং অসম আৰক্ষীয়ে চলোৱা বেদখলৰ বিৰুদ্ধে গুৱাহাটীৰ বিশিষ্ট নাগৰিক অৰুণাচল বিশ্ববিদ্যালয়ৰ প্ৰাক্তন অধ্যাপক অতুল চন্দ্ৰ তালুকদাৰ, প্ৰাক্তন ন্যায়াধীশ যোগেশ্বৰ বৰা, ষ্টে’ট বেংকৰ প্ৰাক্তন বিষয়া নলীনি ৰঞ্জন ৰয় আৰু ছে’ণ্টাৰ ফৰ কোঁচ ৰাজবংশী স্তাডিজ এণ্ড ডিভেলপমেণ্টৰ অধ্যক্ষ, গৱেষক অৰূপজ্যোতি দাসে দাখিল কৰা ৰাজহুৱা স্বাৰ্থজড়িত আবেদন গ্ৰহণ কৰি ন্যায়ালয়ে এই নিৰ্দেশ দিছে।
ন্যায়ালয়ৰ হস্তক্ষেপৰ পিছত কামৰূপ (গ্ৰাম্য)ৰ উপায়ুক্তই দুমাহৰ ভিতৰত আৰক্ষী চকীটো তাৰ পৰা আঁতৰাই নিব বুলি জনাইছে। উপায়ুক্তগৰাকীয়ে লগতে জনাই যে উদ্যানখনত নিৰ্মাণ কৰা দেৱালসমূহো ভাঙি দিয়া হ’ব আৰু উদ্যানখনৰ চোৱা-চিতা আৰু পুঁজি ব্যৱহাৰ কৰাৰ বাবে উপায়ুক্তৰ অধ্যক্ষতাত এখন সমিতি গঠন কৰা হ’ব।
ন্যায়ালয়ৰ ৰায়ত সন্তুষ্টি প্ৰকাশ কৰি ৰাজহুৱা স্বাৰ্থজড়িত আবেদনখন দাখিল কৰা এজন আবেদনকাৰীয়ে এন ই নাওক কয়, ‘‘চিলাৰায়’ৰূপে জনাজাত অসমৰ প্ৰবাদপ্ৰতিম কোঁচ সেনাধ্যক্ষ দেৱান শূক্লধ্বজৰ স্মৃতিত নিৰ্মিত তথা পৰ্য্যটকৰ বাবেও দৰ্শনথলী গুৱাহাটী মহানগৰৰ প্ৰৱেশপথত থকা উদ্যানখনত খোদ অসম আৰক্ষীয়ে চলোৱা বেদখল দুৰ্ভাগ্যজনক আৰু গৰিহণাযোগ্য। উপায়ুক্তই নিজেই এই বেদখল হোৱা বুলি এতিয়া মানি লৈছে।’
উচ্চ ন্যায়ালয়ত আবেদনকাৰীৰ হৈ যুক্তি প্ৰদৰ্শন কৰে অধিবক্তা বিক্ৰম ৰাজখোৱাই।
