অহা নতুন বৰ্ষৰ ফেব্ৰুৱাৰীত গুৱাহাটীত অনুষ্ঠিত হ’বলগীয়া বিশ্ব বিনিয়োগকাৰীৰ শীৰ্ষ সন্মিলনখন (গ্ল’বেল ইনভেষ্টৰছ ছামিট) উদ্বোধন কৰিব প্ৰধানমন্ত্ৰী নেৰন্দ্ৰ মোডীয়ে। ৰাজ্যখনৰ ৰাজধানী চহৰ তথা উত্তৰ –পূবৰ দুৱাৰমুখ হিচাপে পৰিচিত গুৱাহাটীত তিনিদিনীয়াকৈ অনুষ্ঠিত হ’বলগীয়া এই শীৰ্ষ সন্মিলনখনত বিশ্বৰ বিভিন্ন প্ৰান্তৰ বিনিয়োগকাৰীয়ে অংশগ্ৰহন কৰিব।
নতুন দিল্লীত শুকুৰবাৰে অনুষ্ঠিত এখন সংবাদ মেলত এই কথা প্ৰকাশ কৰি মুখ্যমন্ত্ৰী সৰ্বানন্দ সোণোৱালে কয় যে বিশ্বৰ বিনিয়োগকাৰীৰ বাবে দক্ষিণ-পূব এছিয়াৰ অতি গুৰুত্বপূৰ্ণ স্থান হিচাপে বিবেচিত হোৱা গুৱাহাটীত তিনিদিনীয়াকৈ অনুষ্ঠিত হ’বলগীয়া বিশ্ব বিনিয়োগকাৰীৰ এই শীৰ্ষ সন্মিলনখন দেশৰ প্ৰধানমন্ত্ৰী নৰেন্দ্ৰ মোডীয়ে উদ্বোধন কৰিব। সোণোৱালে লগতে কয় যে ঔদ্যোগিক ক্ষেত্ৰত ৰাজ্যখনক আগবঢ়াই নিয়াৰ ক্ষেত্ৰত এই সন্মিলনে সহায় কৰিব।
মুখ্যমন্ত্ৰীয়ে কয় যে ‘’আমি এখন প্ৰদূষণমুক্ত পৰিৱেশ বিচাৰো। আমি প্ৰকৃতিক বিনষ্ট নকৰাকৈ ঔদ্যোগিক বিকাশ হোৱাটো বিচাৰিছো,’’- সোণোৱালে কয়।
অসম বৰ্তমান বিনিয়োগকাৰীৰ বাবে এখন উপযুক্ত ঠাই বুলি উল্লেখ কৰি মুখ্যমন্ত্ৰী সোণোৱালে কয় যে বিনিয়োগকাৰীৰ আগমনে ৰাজ্যখনত নিবনুৱা যুৱক-যুৱতীসকলৰ বাবে সংস্থাপনৰ বাট মুকলি কৰিব।
আনহাতে নতুন দিল্লীত কালি মুখ্যমন্ত্ৰী সোণোৱাল আৰু উদ্যোগ মন্ত্ৰী চন্দ্ৰমোহন পাটোৱাৰীয়ে আগন্তুক শীৰ্ষ সন্মিলনখনত ভাগল’বলগীয়া কেইবাখনো বিনিয়োগকাৰী দেশৰ ৰাষ্ট্ৰদূতৰ সৈতে মিলিত হৈ আলোচনা কৰে।
