আজি বাক্সা জিলাৰ তামুলপু্ৰ মহকুমাৰ অন্তৰ্গত লাওপাৰাৰ জামুগুৰি চ’কত সংঘটিত হয় এক শোকাৱহ পথ দুৰ্ঘটনা। দু্ৰ্ঘটনাত প্ৰায় ৪০ গৰাকী স্কুলীয়া শিক্ষাৰ্থী আহত হোৱা ঘটনাই অঞ্চলটোত শোকাকূল পৰিৱেশৰ সৃষ্টি কৰে।
জানিব পৰা অনুসৰি নাগৰিকত্ব সংশোধনী বিধেয়ক বাতিলৰ দাবীত তামুলপুৰ মহকুমা ছাত্ৰ সন্থাৰ উদ্যোগত গ্ৰহণ কৰা প্ৰতিবাদী কাৰ্যসূচীত অংশ লোৱাৰ উদ্দেশ্যে নাগ্ৰীজুলি খাটৰবাৰী হাইস্কুলৰ পৰা প্ৰায় ৪০ গৰাকী শিক্ষাৰ্থী টাটা ডি আই গাড়ী (এ এছ ০১ ডি চি ৬১৪২) এখনেৰে তামুলপুৰলৈ আহি থকা অৱস্থাতে লাওপাৰাৰ জামগুৰি চ’কত গাড়ীখনে নিয়ন্ত্ৰণ হেৰুৱাই পথৰ কাষত বাগৰি পৰাত এই শোকাৱহ দুৰ্ঘটনাটো সংঘটিত হয়।
দুৰ্ঘটনাটোত প্ৰায় ৪০ গৰাকী স্কুলীয়া ছাত্ৰ-ছাত্ৰী আহত হয়। লগে লগে আহত ছাত্ৰ কেইগৰাকীক স্থানীয় লোকৰ তৎপৰতাত উদ্ধাৰ কৰি তামুলপুৰ প্ৰাথমিক স্বাস্থ্য কেন্দ্ৰ আৰু তামুলপুৰ সমূহীয়া স্বাস্থ্য কেন্দ্ৰত ভৰ্তি কৰায়।
ইফালে দুৰ্ঘটনাটোত গুৰুতৰভাৱে আঘাতপ্ৰাপ্ত হোৱা বিগ্ৰাই স্বৰ্গীয়াৰী, ৰাফেল মুৰ্মু, ভক্তি বিলাস ভট্টৰায়, জিতেন মাঝি, মানিক দাস, বাজি চৰেন, মৃদুল ৰাজবংশী সহ ২০ গৰাকীক উন্নত চিকিৎসাৰ বাবে গুৱহাটী চিকিৎসা মহাবিদ্যালয়লৈ প্ৰেৰণ কৰা হয়। এই ২০ গৰাকী শিক্ষাৰ্থীৰ ভিতৰত আঠগৰাকীৰ অৱস্থা অতিকৈ সংকটজনক বুলি জানিব পৰা গৈছে।
