ছোনী এন্টাৰটেইমেন্ট টেলিভিশ্বনৰ নৃত্যৰ ৰিয়েলিটি শ্ব’ ছুপাৰ ডান্সাৰ প্ৰতিযোগিতাৰ দ্বিতীয় সংস্কৰণত চূড়ান্ত বিজয়ীৰ খিতাপ অৰ্জন কৰিছে অসমৰ যোৰহাটৰ শিশু বিশাল শৰ্মাই। শনিবাৰে নিশা এক বৰ্ণাঢ্য অনুষ্ঠানত বিশালক বিজয়ীৰ খিতাপ প্ৰদান কৰা হয়।
বিশাল আছিল এগৰাকী অত্যন্ত সজীৱ প্ৰদৰ্শনকাৰী আৰু বিচাৰকৰ অন্তৰ জয় কৰি প্ৰতিটো প্ৰদৰ্শনতে তেওঁ এশ শতাংশ উজাৰি দিছিল। প্ৰতিটো নৃত্যৰেই তেওঁ প্ৰতিযোগিতাখনৰ মঞ্চত ধুমুহাৰ সৃষ্টি কৰিছিল।
‘ছুপাৰ ডান্সাৰ ২’ ৰ খিতাপ অৰ্জনৰ সূত্ৰে বিশালে নগদ ১৫ লাখ টকাৰ পুৰস্কাৰৰ লগতে বিজয়ী ট্ৰফী লাভ কৰিছে। তেওঁৰ ‘ছুপাৰ গুৰু’ৱে লাভ কৰিছে ৫ লাখ টকাৰ নগদ পুৰস্কাৰ।
প্ৰতিযোগিতাৰ চাৰিগৰাকী চূড়ান্ত প্ৰতিযোগী ৰিটিক ডিৱাকেৰ, বৈষ্ণৱী প্ৰজাপতি, আকাশ থাপা আৰু বিশাল শৰ্মাই বিগত এসপ্তাহ ধৰি আকৰ্ষণীয় খিতাপটো অৰ্জনৰ বাবে হিয়া উজাৰি নৃত্য প্ৰদৰ্শন কৰিছিল।
দহ বছৰীয়া ৰিটিক ডিৱাকেৰে বিচাৰক শিল্পা ছেট্টী, গীতা কাপুৰ আৰু অনুৰাগ বাসুক তেওঁৰ শীতল আৰু অনন্য শৈলীৰে প্ৰভাৱিত কৰাৰ লগতে পাঁচ বছৰীয়া পানীপটৰ বৈষ্ণৱী প্ৰজাপতিয়ে তেওঁৰ শক্তি আৰু প্ৰতিভাৰে সকলোৰে মৰম বুটলিবলৈ সক্ষম হৈছিল। একেদৰে দেৰাদুনৰ আকাশ থাপাই তেওঁৰ সম্পূৰ্ণ নৃত্যশৈলীৰে তথা আৱেদনেৰে বিচাৰকৰ লগতে দৰ্শকৰ অন্তৰ জয় কৰিছিল।
গড়মূৰ জাতীয় বিদ্যালয়ৰ এগৰাকী সপ্তম শ্ৰেণীৰ ছাত্ৰ বিশালে ২০১৭ ৰ আগষ্টৰ পৰাই দৰ্শকক মুগ্ধ কৰি আহিছিল আৰু চূড়ান্ত বিজয়ী হোৱাৰ পথত এক শক্তিশালী প্ৰতিযোগী হিচাপে বিবেচিত হৈছিল।
বিশালৰ পিতৃ-মাতৃৰ তিনিটা সন্তান আৰু দুটা গাই গৰু পুহি তেওঁলোকে সংসাৰ চলাই আছে। কোনোমতে সংসাৰ চলাই থকা তেওঁলোকৰ পৰিয়ালটো ঋণগ্ৰস্ত হৈ চলি আছে। বিশালৰ এই বিজয়ে পৰিয়াললৈ এক আশাৰ ৰেঙণি কঢ়িয়াই আনিছে।
