জনাজাত চিনে’মা নিৰ্মাতা জাহ্নু বৰুৱাৰ ‘ভগা খিৰিকী’ নামৰ অসমীয়া চিনে’মাখন সুখ্যাত হিন্দী চিনে’মা ‘The Lunchbox’ৰ প্ৰযোজক শ্বাহনাব আলমৰ সৈতে যুটীয়াভাৱে প্ৰযোজনা কৰিছে অভিনেত্ৰী প্ৰিয়ংকা চ’প্ৰাই।
অসমৰ চিনে’মাপ্ৰেমীলৈ সুখবৰ কঢ়িয়াই অসম পৰ্য্যটনৰ ব্ৰেণ্ড এম্বেচেদৰ তথা বিশ্বজুৰি জনাজাত প্ৰিয়ংকা চ’প্ৰাই অসমীয়া চিনে’মা উদ্যোগত বিনিয়োগৰ বাবে আগবাঢ়ি আহিছে। জাহ্নু বৰুৱাৰ এই চিনে’মা খন হ’ল চ’প্ৰাৰ প্ৰথম প্ৰকল্প।
কাজিৰঙা আৰু বোকাখাতত ৩২ দিন ধৰি এই ৩-৩.৫ কোটিটকীয়া চিনে’মাখনৰ দৃশ্যগ্ৰহণ কৰা হয়। সীমা বিশ্বাস, বিষ্ণু খাৰঘৰীয়া, জেৰিফা ৱাহিদ, সঞ্জয় খাৰঘৰীয়া, জয় কাশ্যপ আদি অভিনেতাই এই চিনে’মাখনত অভিনয় কৰিছে।
বৃ্হস্পতিবাৰে গুৱাহাটীত সাংবাদিকৰে হোৱা কথা বতৰাত জাহ্নু বৰুৱাই কয়, ‘চিনে’মাখন এটা সঁচা ঘটনা আধাৰিত। মই এতিয়াই কাহিনীটো পূৰাকে কৈ দিব নোৱাৰো। ই উজনি অসমৰ এখন গাঁৱৰ ওপৰত আধাৰিত। এগৰাকী প্ৰগতিশীল মনৰ মহিলা আৰু তেওঁৰ সংগ্ৰামক লৈয়ে এই কাহিনীটো। চিনে’মাখনে ধৰি ৰখা সময়খিনি ২০১৫ চনৰ।’
চিনে’মাখনত ‘তগৰ’ চৰিত্ৰত অভিনয় কৰা জেৰিফা ৱাহিদে কয়, ‘জাহ্নুদাৰ সৈতে কাম কৰাটো সদায় এক বিশেষ অভিজ্ঞতা কাৰণ বহু কথা শিকিব পৰা যায়। মই চিনে’মাখনত গাঁৱৰ এজনী সৰল ছোৱালী তগৰৰ ভূমিকাত অভিনয় কৰিছো। গাঁৱত থাকে যদিও তাই নিজৰ বাবে কিছুমান আদৰ্শ ঠিক কৰি লৈছে।’
চিনে’মাখনত অভিনেত্ৰী জেৰিফাৰ মাকৰ চৰিত্ৰ ৰূপায়ন কৰা অভিজ্ঞ অভিনেত্ৰী সীমা বিশ্বাসে কয়, ‘চিনে’মাখনত মাক জীয়েকৰ বন্ধোন বৰ শক্তিশালী। সমাজ-ৰাজনৈতিক প্ৰসংগেৰে ই এক গভীৰ মানৱীয় কাহিনী। আমি বহুত দিন কাজিৰঙাত থাকিলো। আচলতে এইটো আছিল কাজিৰঙাত মোৰ দীৰ্ঘতম যাপন।’
হলিউদত ব্যস্ত থকাৰ বাবে বোলে প্ৰিয়ংকা চ’প্ৰা আহিব নোৱাৰা হেতুকে ৱিডিঅ’ বাৰ্তাৰ যোগেদি তেওঁ চিনে’মাখনৰ দলটোলৈ নিজৰ শুভেচ্ছা প্ৰেৰণ কৰিছে।
প্ৰিয়ংকাৰ মাক তথা তেওঁৰ পাৰ্পল পেবল নামৰ প্ৰযোজনা সংস্থাটোৰ পৰিচালিকা ডঃ মধু চ’প্ৰাই এপ্ৰিলত চিনে’মাখনৰ প্ৰচাৰ চলাবৰ বাবে প্ৰিয়ংকা অসমলৈ অহাৰ এক ইংগিত দিছে।
তেওঁ জনায়, ‘নাহিলেও তেওঁ চ’শ্যেল মীডিয়াৰ যোগেদি চিনে’মাখনৰ প্ৰচাৰ চলাব।’
ডঃ চ’প্ৰাই ‘নিজৰ মূল্যবোধত খোপনি থকা একে সময়তে প্ৰগতিশীল শক্তিশালী মহিলা চৰিত্ৰ’ বিষয়ক বোলা ‘ভগা খিৰিকী’খন দেশজুৰি লৈ যাবলৈ তেওঁৰ প্ৰযোজনা সংস্থাটোৱে চেষ্টা কৰিব বুলি কয়।
