অসমত জৈৱিকভাৱে উৎপাদিত গাখীৰৰ ক্ৰমবৰ্ধিত চাহিদাৰ প্ৰতি লক্ষ্য ৰাখি অসমৰ প্ৰতিখন জিলাক সামৰিব পৰাকৈ ‘জৈৱিকভাৱে উৎপাদিত দুগ্ধজাত সামগ্ৰী’ প্ৰকল্পৰ পৰিকল্পনা কৰা হৈছে। এই পৃষ্ঠভূমিত চৰকাৰে আগন্তুক ‘বিশ্ব বিনিয়োগকাৰীৰ সন্মিলন- এডভাণ্টেইজ অসম’ত গোটখোৱা বিনিয়োগকাৰী এই প্ৰকল্পৰ বাবে আগ্ৰহী হোৱাটো আশা কৰিছে।
উল্লেখযোগ্য যে অহা ৩ আৰু ৪ ফেব্ৰুৱাৰিত গুৱাহাটীত দুদিনীয়াকৈ বিশ্ব বিনিয়োগকাৰীসকলৰ সন্মিলন হ’ব। অসমত ইমান বৃহৎ পৰিসৰৰ বিনিয়োগকাৰীৰ মেলা এয়ে প্ৰথম। আনহাতে অসমৰ ক্ৰমবৰ্ধিত মধ্যবিত্ত শ্ৰেণীৰ আয় বৃদ্ধিৰ সমান্তৰালভাৱে বৃদ্ধি হৈছে স্বাস্থ্যচেতনা। গতিকে জৈৱিকভাৱে উৎপাদিত খাদ্য সামগ্ৰীৰ প্ৰতি বিশেষ আগ্ৰহ পৰিলক্ষিত হৈছে। জৈৱিকভাৱে উৎপাদিত গাখীৰ আৰু গাখীৰজাত সামগ্ৰীৰো একে ব্যাপক চাহিদা দেখা যায়।
এই প্ৰকল্পটোৰ জৰিয়তে জৈৱিকভাৱে উৎপাদিত দুগ্ধজাত সামগ্ৰীৰ বৰ্ধিত চাহিদা পূৰাব খোজাৰ লগতে জনসাধাৰণক স্বাস্থ্যসন্মত খাদ্য সামগ্ৰীও যোগান ধৰিব বিচৰা হৈছে।
Under Mission Organic Value Chain Development আঁচনিৰ অধীনত অসম জৈৱিক খেতি চৰকাৰে স্থাপন কৰা ৫ হাজাৰ হেক্টৰ কৃষি ভূমিত কৰিবলৈ লোৱা জৈৱিক কৃষি ইয়াৰ মূল আধাৰ হ’ব।
বিনিয়োগকাৰীসকলে পশুধন যোগান আৰু পৰিচালনা কৰা, জৈৱিক পশুখাদ্যৰ যোগান, মজুত ব্যৱস্থা আৰু শীতলীকৰণ ব্যৱস্থাৰ লগতে বজাৰৰ আন্তঃগাঁথনি সৃষ্টি কৰাত আগ্ৰহী হ’ব বুলি আশা কৰা হৈছে। এই প্ৰকল্পটোৰ ক্ষেত্ৰত সমন্বয়ক ভূমিকা ল’ব পশুপালন আৰু পশুস্বাস্থ্য বিভাগে।
