বিদ্ৰোহী বিধায়কসকলক দললৈ ঘুৰাই অনাৰ বাবে নতুনকৈ নিযুক্তি পোৱা সভাপতি ভিনচেন্ট পালাৰ নেতৃত্বৰ মেঘালয় প্ৰদেশ কংগ্ৰেছ কমিটি ব্যৰ্থ হৈছে।
অহা ২৭ ফেব্ৰুৱাৰীত মেঘালয় বিধানসভাৰ নিৰ্বাচন অনুষ্ঠিত হ’ব।
মেঘালয় কংগ্ৰেছৰ সভাপতি তথা শ্বিলং লোকসভা সমষ্টিৰ সাংসদ পালাই প্ৰকাশ কৰে যে বিদ্ৰোহী সকলো সদস্যৰ সৈতে তেওঁ বৈঠকত মিলিত হৈছিল আৰু তেওঁলোকক কংগ্ৰেছলৈ উভতি আহিবলৈ আহ্বান জনাইছিল। কিন্তু বিদ্ৰোহী বিধায়কসকলে ‘’বহু পলম হৈ গ’ল’’ বুলি প্ৰকাশ কৰি উভতি আহিবলৈ অস্বীকাৰ কৰে।
এইখিনিতে উল্লেখ কৰিব পাৰি যে এগৰাকী মন্ত্ৰী আৰু ছয় গৰাকী বিধায়ককে ধৰি কেইবাগৰাকীও কংগ্ৰেছ নেতাই মেঘালয়ৰ মুখ্যমন্ত্ৰী ড০ মুকুল চাংমাৰ কামকাজত অসন্তুষ্টি প্ৰকাশ কৰি দলৰ পৰা পদত্যাগ কৰিছিল।
সংবাদ মাধ্যমৰ বাতৰি অনুসৰি নিখিল ভাৰত কংগ্ৰেছ কমিটিৰ সাধাৰণ সম্পাদক তথা মেঘালয়ৰ দায়িত্বত থকা জ্যেষ্ঠ কংগ্ৰেছ নেতা চি পি যোশীয়ে মঙলবাৰে মেঘালয় কংগ্ৰেছৰ নিৰ্বাচনী সমিতিৰ এখন বৈঠকত সভাপতিত্ব কৰিব।
সোমবাৰে সন্ধিয়া যোশী আহি শ্বিলঙত উপস্থিত হ’ব। আসন্ন মেঘালয় বিধানসভাৰ নিৰ্বাচনৰ বাবে দলৰ প্ৰাৰ্থী তালিকাখন নিৰ্বাচনী সমিতিৰ লগত আলোচনা কৰি যোশীয়ে চূড়ান্ত কৰিব বুলি আশা কৰা হৈছে। চূড়ান্ত তালিকাখন যোশীয়ে অনুমোদনৰ বাবে হাই কমাণ্ডৰ ওচৰত দাখিল কৰিব।
আনহাতে, জানিব পৰা মতে মেঘালয়ৰ গৃহমন্ত্ৰী তথা মেঘালয় কংগ্ৰেছৰ নিৰ্বাচনী প্ৰচাৰ সমিতিৰ নেতৃত্বত থকা এইচ ডি আৰ লিংডোৱে সোমবাৰে যোশীক সাক্ষাৎ কৰি দলৰ নিৰ্বাচনী ৰণ কৌশল সম্পৰ্কে আলোচনা কৰিব।
এই বৈঠকতে মেঘালয় বিধানসভাৰ নিৰ্বাচনী প্ৰচাৰত অংশগ্ৰহণ কৰিবলগীয়া তাৰকা প্ৰচাৰকৰ বিষয়েও সিদ্ধান্ত গ্ৰহণ কৰিব।
জানিব পৰা মতে নতুনকৈ নিযুক্ত নিখিল ভাৰত কংগ্ৰেছ কমিটিৰ সভাপতি ৰাহুল গান্ধীয়ে ৰাজ্যখনত দলীয় প্ৰাৰ্থীৰ হৈ নিৰ্বাচনী প্ৰচাৰ চলাবলৈ সোনকালেই মেঘালয় ভ্ৰমণলৈ আহিব।
