নগাঁৱৰ ঐতিহ্যমণ্ডিত পুৰণিগুদামৰ ৰাধা কান্ত বৰুৱা উচ্চতৰ মাধ্যমিক বিদ্যালয়ত কালি নাগৰিকত্ব সংশোধনী বিধেয়ক ২০১৬ৰ বিৰোধিতাৰে চি পি আই এমৰ উদ্যোগত এখন সজাগতা সভা অনুষ্ঠিত হৈ যায়।
বিশিষ্ট সাহিত্যিক, প্ৰবীণ সাংবাদিক ফণীন্দ্ৰ নাথ গায়নৰ সভাপতিত্বত অনুষ্ঠিত হোৱা সজাগতা সভাখনৰ উদ্দেশ্য বাখ্যা কৰে প্ৰাক্তন শিক্ষক তথা চি পি আই এমৰ নেতা অমৰেন্দ্ৰ শৰ্মাই। বিধেয়কখনৰ ওপৰত চি পি আই এম দলৰ স্থিতি স্পষ্ট কৰি শৰ্মাই কয় যে ভাৰতীয় সংবিধানৰ ধৰ্মনিৰপেক্ষ দৃষ্টিভঙ্গী ঠাইত ধৰ্মৰ মাফকাঠিৰে নাগৰিকত্ব বিচাৰ কৰিবলৈ লোৱা বিজেপিৰ চক্ৰান্ত চি পি আই এমে কেতিয়াও সহজভাৱে গ্ৰহণ নকৰে।
উচ্চতম ন্যায়ালয়ৰ তত্বাৱধানত সম্প্ৰতি চলি থকা এন আৰ চি উন্নীতকৰণ প্ৰক্ৰিয়াত বিজেপি, আৰ এছ এছে ব্যাঘাত জন্মাবলৈকে জনবিৰোধী বিধেয়কখন গৃহীত কৰিবলৈ চেষ্টা অব্যাহত ৰাখিছে বুলি উল্লেখ কৰি শৰ্মাই কয় যে ১৯৭১ চনৰ ২৪ মাৰ্চৰ পিছত অহা কোনো বিদেশীক অসমত সংস্থাপিত কৰিবলৈ দিয়া নহ’ব।
শৰ্মাই লগতে কয় যে, ৬ বছৰীয়া বিদেশী বিতাড়ন আন্দোলন আৰু ৮৫৫ গৰাকী শ্বহীদৰ তেজৰ বিনিময়ত হোৱা অসম চুক্তিক বিজেপিয়ে অৱজ্ঞাৰ দৃষ্টিৰে চাইছে।
চি পি আই এম দলে বিতৰ্কিত বিধেয়কখনৰ সন্দৰ্ভত ৰাইজৰ লগত মতবিনিময় কৰাৰ লগতে সজাগতা সৃষ্টিৰ উদ্দেশ্যে অনুষ্ঠিত কৰা সভাখনত নগাঁও বাণিজ্য মহাবিদ্যালয়ৰ প্ৰাক্তন অধ্যক্ষ গুণ গগৈ উপস্থিত থাকি নিজৰ ভাষণ প্ৰসঙ্গত কয়, ‘দেশৰ ২৭ টা ইলেক্ট্ৰনিক সংবাদ মাধ্যমৰ লগত বিজেপি দলে চুক্তি কৰি দিনক ৰাতি আৰু ৰাতিক দিন কৰাৰ জৰিয়তে ২০১৯ৰ লোক সভা নিৰ্বাচন জিকাৰ ব্যৱস্থা কৰিছে।’
ইয়াৰ উপৰি সভাত চি পি আই এমৰ নেতা গোৱিন নাথ উপস্থিত থাকি বক্তব্য আগবঢ়ায়। আজিৰ এই সজাগতা সভাৰ জৰিয়তে সাম্প্ৰদায়িক মন্তব্যবোৰক গুৰুত্ব আৰোপ নকৰিবলৈ দলটোৱে ৰাইজক আহ্বান জনায়।
