২০২২ চনৰ ভিতৰত কৃষকৰ উপাৰ্জন দুগুণ কৰাৰ লক্ষ্যৰ এক অংশ হিচাপে কৃষকসকলে যাতে উৎপাদন খৰচ বাদ দিও ৫০ শতাংশ লাভ লৈ উৎপাদিত কৃষিজাত সামগ্ৰী বিক্ৰী কৰিব পৰা ব্যৱস্থাটো ইতিমধ্যে কাৰ্য্যকৰী কৰা হৈছে বুলি আজি কেন্দ্ৰীয় কৃষি আৰু কৃষক কল্যাণ মন্ত্ৰী ৰাধামোহন সিঙে জানিবলৈ দিয়ে।
উল্লেখ্য যে এইখন চৰকাৰৰ দিনত দেশত ২৪ ঘণ্টাৰ ভিতৰত গড়ে ৩৫গৰাকী কৃষকে আত্মহত্যা কৰা বুলি অভিযোগ উঠাৰ সময়তে কেন্দ্ৰীয় কৃষি মন্ত্ৰীগৰাকীয়ে মঙলবাৰে গুৱাহাটীৰ হেঙেৰাবাৰীস্থিত ৰাজ্যিক বিজেপিৰ কাৰ্য্যালয়ত এখন সংবাদমেল সম্বোধন কৰি এই কথা জানিবলৈ দিয়ে।
মন্ত্ৰীজনে আজিৰ সংবাদমেলত লগতে কয় যে ২০২২ চনৰ ভিতৰত কৃষকৰ উপাৰ্জন দুগুণ কৰাৰ লক্ষ্য কেন্দ্ৰীয় চৰকাৰৰ এক সৰ্বাত্মক অংগীকাৰৰ অংশ।
এই সন্দৰ্ভত তেওঁ সংবাদমেলত তথ্য দাঙি ধৰি মন্ত্ৰীজনে কয় যে কৃষকৰ দ্বাৰা উৎপাদিত মগু দাইলৰ সমৰ্থন মূল্য প্ৰতি কুইণ্টল ১৪০০ টকালৈ, ক’লা তিল ১৮২৭ টকালৈ প্ৰতি কুইণ্টল, বেলিফুল (ছানফ্লাৱাৰ) প্ৰতি কুইণ্টল ১২৪৪ টকালৈ আৰু প্ৰতি কুইণ্টল কপাহৰ মূল্য ১১৩০ টকালৈ বৃদ্ধি কৰা হৈছে।
আনহাতে, প্রধান খাদ্য শস্য ধানৰ ক্ষেত্ৰত প্ৰতি কুইণ্টলত বৃদ্ধি কৰা ২০০ টকা হ’ল সৰ্বাধিক বৃদ্ধিকৰণ।
বিভিন্ন খাদ্যসশ্যৰ নিম্নতম সমৰ্থন মূল্য বৃদ্ধিকৰণ এনেধৰণৰ– ধান প্ৰতি কুইণ্টলত ২০০টকাকৈ, বৰ্ণসংকৰ জোৱাৰ প্ৰতি কুইণ্টলত ৭৩০ টকাকৈ, ৰাগী প্ৰতি কুইণ্টলত ৯৯৭ টকাকৈ। এইক্ষেত্ৰত বিগত বৰ্ষতকৈ শতকৰা হাৰত ৰাগী শস্য ৫২.৪৭ শতাংশ আৰু বৰ্ণসংকৰ জোৱাৰ ৪২.৯৪ শতাংশ মূল্য বৃদ্ধি হৈছে।
তেওঁ লগতে জানিবলৈ দিয়া অনুসৰি ৰহৰ দাইলৰ নিম্নতম সমৰ্থন মূল্য প্ৰতি কুইণ্টলত ২২৫ টকা আৰু মাটি মাহৰ প্ৰতি কুইণ্টলৰ মূল্য ২০০ টকা বৃদ্ধি কৰাৰ ফলত ব্যয়ৰ বিপৰীতে ক্ৰমে ৬৫.৩৬ শতাংশ আৰু ৬২.৮৯ পোৱা গৈছে যাৰ ফলত বিভিন্ন শস্যৰ মূল্যক সমতুল কৰি ৰখা হৈছে।
আনহাতে, উক্ত সংবাদমেলতে কৃষকৰ উৎপাদন বৃদ্ধি, উৎপাদনৰ খৰচ হ্ৰাস আৰু শস্য চপোৱাৰ পিছত সম্পূৰ্ণ ব্যৱস্থাপনাকে ধৰি বজাৰ নিয়ন্ত্ৰণ কৰা হৈছে বুলি কেন্দ্ৰীয় মন্ত্ৰীজনে সদৰী কৰে।
তেওঁ লগতে কয়, “কৃষকৰ উপাৰ্জন দুগুণ কৰাৰ বাবে Model Agricultural Produce and Livestock Marketing Act, 2017 আৰু Model contract farming and services Act, 2018, এই আইন দুখন সন্নিৱিষ্ট কৰা হৈছে।”
উল্লেখ্য যে, ভাৰতবৰ্ষৰ বহুতো ৰাজ্যই ইতিমধ্যে বিধান সভাত আইন প্ৰণয়ন কৰি ইয়াৰ ব্যৱস্থা গ্ৰহণ কৰা বুলি তেওঁ কয়।
আনহাতে, মাহজাতীয় শস্যৰ খেতিৰ উত্তৰণ হ’লে ভাৰতবৰ্ষৰ পুষ্টিহীনতা দূৰীকৰণ, নাইট্ৰ’জেন সংযোজনেৰে ভূমিৰ অধিক সাৰুৱাকৰণ আৰু কৃষকৰ আয় স্বাভাৱিকেই বৃদ্ধি হ’ব বুলি তেওঁ সংবাদমেলত সদৰী কৰে।
ইয়াৰোপৰি ই দেশত শস্যজাতীয় সামগ্ৰীৰ আমদানিৰ পৰিমাণ হ্ৰাস কৰিব। লগতে নিম্নতম সমৰ্থন মূল্য বৃদ্ধিৰ ফলত উৎপাদনো বৃদ্ধি হ’ব।
আনহাতে, মোদী নেতৃত্বাধীন কেন্দ্ৰীয় চৰকাৰে কৃষকৰ উৎপাদিত সামগ্ৰীৰ উচিত মূল্যৰ ক্ষেত্ৰত বজাৰ নিয়ন্ত্ৰণ ব্যৱস্থাৰ বাবে কাম কৰি থকা বুলি জানিবলৈ দি লগতে কয়, “ঘোষিত নীতিৰ আধাৰত ২২ হাজাৰখন গ্ৰামীণ খুচুৰা বজাৰৰ ব্যৱস্থা কৰা হৈছে, য’ত প্ৰতিযোগিতামূলক স্বচ্ছ সুলভ মূল্যৰ প্ৰাধান্য থাকিব।”
আনহাতে, বিগত কংগ্ৰেছ চৰকাৰে ২০১০-১৪ চনৰ ভিতৰত ৰাষ্ট্ৰীয় সমবায় বিকাশ লিমিটেডৰ অধীনত ৯০ লাখ টকাহে ঋণ হিচাপে মুকলি কৰি দিছিল যদিও ইয়াৰে ২০ লাখ টকাহে অসমে লাভ কৰিছিল বুলি তেওঁ জানিবলৈ দিয়ে।
ইয়াৰ বিপৰীতে বিজেপি চৰকাৰে শাসনলৈ অহাৰ ৪ বছৰৰ ভিতৰত ৫৫.৪৬ কোটি টকা কৃষি ঋণ নিৰ্ধাৰণ কৰিছে যদিও বৰ্তমানলৈকে অসমে এই ধনৰাশিৰ পৰা ১১ কোটি টকা লাভ কৰিছে বুলিও তেওঁ কয়।
তাৎপৰ্য্যপূৰ্ণভাৱে চলিত বৰ্ষৰ ডিচেম্বৰ মাহত পশুপালন, মীনপালন আৰু খেতি-বাতি কৰাৰ বাবদ প্ৰায় ৬ হাজাৰ কোটি টকা অসমৰ কৃষকলৈ ঋণ হিচাপে মুকলি কৰি দিয়াৰ কথা ঘোষণা কৰে কেন্দ্ৰীয় কৃষি মন্ত্ৰী গৰাকীয়ে। ইতিমধ্যে ইয়াৰ ডিপিআৰ প্ৰস্তুত হৈছে বুলিও তেওঁ সংবাদমেলত জনায়।
