এন আৰ চি উন্নীতকৰণ প্ৰক্ৰিয়াৰ অজুহাত দেখুৱাই পঞ্চায়ত নিৰ্বাচন পতাৰ পৰা বিৰত থাকিব খোজা ৰাজ্য চৰকাৰক গুৱাহাটী উচ্চ ন্যায়ালয়ে নিৰ্বাচন পাতিবলৈ কঠোৰ নিৰ্দেশ দিছে। ২৯ মে’ত উচ্চ ন্যায়ালয়ে এটা নিৰ্দেশত ৰাজ্য চৰকাৰক অহা ১৫ ছেপ্তেম্বৰৰ ভিতৰত পঞ্চায়ত নিৰ্বাচন পাতিবলৈ আদেশ দিছে।
এই নিৰ্দেশটোত মুঠ তিনিটা পৰ্য্যায়ত নিৰ্বাচন অনুষ্ঠিত কৰিবলৈ কোৱা হৈছে। লগতে নিৰ্বাচনৰ কাম-কাজ চোৱাচিতাৰ বাবে কমিটী গঠন কৰিবলৈও চৰকাৰক নিৰ্দেশ দিছে। ন্যায়ালয়ে এই নিৰ্দেশটোৰ জৰিয়তে এই সন্দৰ্ভত ইতিপূৰ্বে দিয়া নিৰ্দেশবোৰ খাৰিজ কৰা বুলিও জানিবলৈ দিছে।
উল্লেখযোগ্য যে যোৱা ১৯ ফেব্ৰুৱাৰিতে বৰ্তমানৰ পঞ্চায়ত প্ৰতিনিধিসকলৰ কাৰ্য্যকাল অন্ত পৰিছে যদিও তেওঁলোকেই পৰৱৰ্তী নিৰ্বাচিত প্ৰতিনিধিসকলে দায়িত্ব নোলোৱা পৰ্য্যন্ত কাম চলাই নিব লাগিব বুলি উচ্চ ন্যায়ালয়ে পূৰ্বে নিৰ্দেশ দিছিল।
মন কৰিব লগীয়া যে ৰাজ্যৰ নিৰ্বাচন আয়োগে সকলো সময়তে কৈ আহিছে যে পঞ্চায়ত নিৰ্বাচন অনুষ্ঠিত কৰিব পৰাকৈ ৰাজ্যিক নিৰ্বাচন আয়োগ সাজু হৈ আছে। তাৰ পিছতো কৰ্মচাৰীসকল এন আৰ চি উন্নীতকৰণৰ কামত লাগি থকাৰ অজুহাতত ৰাজ্য চৰকাৰে পঞ্চায়ত নিৰ্বাচনৰ পৰা মূৰপোলোকা মাৰিবৰ চেষ্টা কৰি আহিছে।
কিন্তু অহা ৩০ জুনত যিহেতু এন আৰ চি উন্নীতকৰণ প্ৰক্ৰিয়াৰ দ্বিতীয়খন তথা চূড়ান্ত খচৰা প্ৰকাশ পাব, তেনেস্থলত ১৫ ছেপ্তেম্বৰত নিৰ্বাচন পাতিবলৈ উচ্চ ন্যায়ালয়ে দিয়া নিৰ্দেশটোৰ ক্ষেত্ৰত ৰাজ্য চৰকাৰে কি অজুহাত লয় সেয়া লক্ষণীয় হ’ব।
যিহেতু ২০১৯ৰ আৰম্ভণিতে দেশত সাধাৰণ নিৰ্বাচন অনুষ্ঠিত হ’ব, ৰাজ্য চৰকাৰখনে তাৰেই অজুহাত লোৱাৰ সম্ভাৱনা বেছি। কাৰণ পঞ্চায়ত নিৰ্বাচনত আশানুৰূপ ফল লাভ কৰাৰ ক্ষেত্ৰত ৰাজ্যৰ শাসনাধিষ্ঠিত বিজেপি দল আৰু চৰকাৰ কোনোটোৱেই আত্মবিশ্বাসী হৈ থকা নাই। নাগৰিকত্ব বিধেয়কক লৈ ৰাজ্যবাসীৰ প্ৰৱল প্ৰতিবাদৰ সন্মুখীন হৈ থকা চৰকাৰখনৰ ক্ষেত্ৰত এইটো তেনেই স্বাভাৱিক।
আনহাতে পঞ্চায়ত প্ৰতিনিধিসকলে প্ৰায় ৪৫ মাহ ধৰি দৰমহা নোপোৱাকৈ আছে। তেওঁলোকৰ বিধিগত কাৰ্য্যকাল কেতিয়াবাই অন্ত পৰিছে যদিও এতিয়াও পাব লগীয়া সামান্য পৰিমাণৰ পাৰিতোষিকৰ টকাকেইটাও নাই পোৱা। ইয়াৰ বিপৰীতে যোৱা বিধানসভাৰ অধিৱেশনৰ সময়তে বিধানসভালৈ নিৰ্বাচিত জনপ্ৰতিনিধিসকলে নিজৰ দৰমহা বৃদ্ধি কৰি পূৰ্বৰ দৰমহাৰ প্ৰায় ডেৰগুণ কৰি ল’লে।
