সীমান্ত সুৰক্ষা বাহিনীৰ অভিযানকাৰী এটা দলে ত্ৰিপুৰাত শুকুৰবাৰে বাংলাদেশলৈ নিয়াৰ পথত এক বৃহৎ পৰিমানৰ ড্ৰাগছ জব্দ কৰে আৰু এজন চোৰাং সৰবৰাহকাৰীক গ্ৰেপ্তাৰ কৰে।
‘’ অভিযানকাৰী দলটোৱে এজন ভাৰতীয় নাগৰিক ৩২ বছৰীয়া ৰছিদ মিঞাক গ্ৰেপ্তাৰ কৰে আৰু পশ্চিম ত্ৰিপুৰাৰ যাত্ৰাপুৰ নামৰ সীমান্ত গাঁৱখনৰ তেওঁৰ বাসগৃহৰ পৰা ৪৮১ কিলোগ্ৰাম শুকান ‘গাঞ্জা’ জব্দ কৰে। এই নিষিদ্ধ দ্ৰব্যখিনৰ বজাৰ মূল্য হ’ব প্ৰায় ২৪ লাখ টকা,’’-বিএছএফৰ এগৰাকী বিষয়াই কয়।
শুকান গাঞ্জাখিন ৰছিদে মজিয়াত টোপোলা বান্ধি ৰাখিছিল। তালাচীৰ পূৰ্বে ৰছিদৰ জ্যেষ্ঠ ভাতৃ মফিছ মিঞা (৩৫) পলাই গৈছিল।
আন এক তালাচীৰ সময়ত অভিযানকাৰী দলটোৱে ছেফিজালা জিলাৰ শ্ৰীমন্তপুৰৰ পৰা ২,৮৯৫ টা নিচাযুক্ত টেবলেট জব্দ কৰে।
চোৰাং সৰবৰাহকাৰীৰ এটা দলে পলিথিন বেগত কঢ়িয়াই অনা ১,৪৪৭,৫০০ টকা মূল্যৰ টেবলেট খিনি বিএছএফৰ জোৱানসকলক দেখি পেলাই থৈ পলাই যায়।
আন এগৰাকী বিএছএফৰ বিষয়াই কয় যে ৪,৫৬৬ টা নিচাযুক্ত দ্ৰব্যৰ টেবলেট যোৱা সপ্তাহত অসমৰ মানকাচৰৰ পৰা আৰু আন ১১০ টা টেবলেট মেঘালয়ৰ গাৰো পাহাৰৰ পৰা জব্দ কৰা হৈছিল। এই ড্ৰাগছসমূহ বাংলাদেশলৈ নিয়াৰ পথত জব্দ কৰা হৈছিল।
উক্ত ঘটনাৰ লগত জড়িত থকা ছামছুল আলম আৰু নুৰ মহম্মদক গ্ৰেপ্তাৰ কৰা হৈছিল। ত্ৰিপুৰাৰ ৮৫৬ কিলোমিটাৰ, মেঘালয়ৰ ৪৪৩ কিলোমিটাৰ, মিজোৰামৰ ৩১৮ কিলোমিটাৰ আৰু অসমৰ ২৬৩ কিলোমিটাৰকে ধৰি মুঠ ১,৮৮০ কিলোমিটাৰ সীমান্ত বাংলাদেশৰ সৈতে সংলগ্ন হৈ আছে।
