‘বি টি চি অসমৰ অবিচ্ছেদ্দ অংগ। বি টি চিৰ লগতে অন্যান্য অঞ্চলৰ উন্নয়ন হ’লেহে ৰাজ্যখনৰ উন্নয়ন হ’ব’, বুলি বি পি এফৰ ভেৰগাঁও জিলা মহোৎসৱ আৰু বি পি এফ ভেৰগাঁও জিলা সমিতিৰ চতুৰ্থ ত্ৰিবাৰ্ষিক অধিৱেশনত উপস্থিত থাকি বি টি চি প্ৰধান হাগ্ৰামা মহিলাৰীয়ে মন্তব্য কৰে।
সোমবাৰে খৈৰাবাৰীৰ মহিৰংগ ভৱনত সামৰণি পৰা অধিৱেশনখনত মুখ্য অতিথি হিচাপে উপস্থিত থকা হাগ্ৰামা মহিলাৰীয়ে কয়- বি টি চিত কোনো নতুন ভূমি নীতি তৈয়াৰ কৰা নাই। পূৰ্বৰ নীতিয়ে চলি আছে আৰু চলি থাকিব।
তিনিদিনীয়াকৈ অনুষ্ঠিত হোৱা অধিৱেশনৰ সামৰণিৰ দিনা বিভিন্ন জাতি-জনগোষ্ঠীৰ কৃষ্টি সংস্কৃতিৰে সমদল উলিওৱাৰ পাছত দুপৰীয়া বিধায়ক মহেশ্বৰ বড়োৰ সঞ্চালনাত অনুষ্ঠিত হয় মুকলি সভা। মুকলি সভাত নিৰ্দিষ্ট বক্তা হিচাপে উপস্থিত থকা সাংসদ বিশ্বজিৎ দৈমাৰীয়ে বি পি এফ দল কেবল ৰাজনৈতিক দলেই নহয় ই সমাজিক সাংস্কৃতিক দল। দলটোৰ এটা ইতিহাস আছে বুলিও তাৎপৰ্যমূলক মন্তব্য কৰে।
সভাত বি পি এফৰ কেন্দ্ৰীয় পৰ্যায়ৰ নেতা, বিধায়ক, ই এম এম চি এল এ, সাংসদ, সমাজ কৰ্মী আদি উপস্থিত থাকি মুকলি সভাখন অধিক আকৰ্ষিত কৰি তোলে।
আনহাতে উক্ত সভাত কংগ্ৰেছ, আছু, ইউ পি পি আদিৰ পৰা ১০ জন নেতা বি পি এফত যোগদান কৰা পৰিলক্ষিত হয়।
