গুৱাহাটী উজান বজাৰস্থিত আৰ্থ-সামাজিক উন্নয়ন সংস্থা ’মুক্তি’ৰ উদ্যোগত শুকুৰবাৰে গোৱালপাৰা জিলাৰ বিকালী মহাবিদ্যালয় প্ৰেক্ষাগৃহত সদ্যঘোষিত সাহিত্য অকাদেমিৰ বঁটাপ্ৰাপকসকলৰ এক বিশেষ অভিনন্দন অনুষ্ঠান অনুষ্ঠিত হয়।
সংবাদ মাধ্যমলৈ প্ৰেৰণ কৰা এক সংবাদ বিজ্ঞপ্তিত ’মুক্তি’ৰ সম্পাদক জয়ন্ত কুমাৰ ডেকাই জানিবলৈ দিয়া মতে গোৱালপাৰাৰ বিকালী মহাবিদ্যালয়ৰ সহযোগত অনুষ্ঠিত উক্ত অনুষ্ঠানত ২০১৮ বৰ্ষৰ সাহিত্য অকাদেমিৰ যুৱ সাহিত্য বঁটাপ্ৰাপক বিপাশা বৰা, সাহিত্য অকাদেমিৰ শিশু সাহিত্যৰ অসমীয়া আৰু বড়ো ভাষাৰ বঁটা লাভ কৰা সাহিত্যিক ক্ৰমে যুগললোচন দাস আৰু সীতাৰাম বসুমতাৰীক বিশেষ সম্বৰ্ধনা জ্ঞাপন কৰা হয়।
মহাবিদ্যালয়ৰ ছাত্ৰীসকলে পৰিৱেশন কৰা সৰস্বতী বন্দনাৰে আৰম্ভ হোৱা অনুষ্ঠানত বন্তি প্ৰজ্বলনেৰে কাৰ্যসূচীৰ শুভাৰম্ভ কৰে ড০ আল্পনা সৰকাৰ ডেকাই। ইয়াৰ পিছত এই উপলক্ষে ‘মুক্তি’ৰ নৱনিৰ্বাচিত কাৰ্যকৰী সভাপতি নৰেন্দ্ৰনাথ ডেকাৰ পৌৰোহিত্যত মুকলি সভা অনুষ্ঠিত হয়।
অনুষ্ঠানত মুখ্য অতিথি হিচাপে উপস্থিত থাকি বিশিষ্ট লেখক-কবি-ঔপন্যাসিক পংকজগোবিন্দ মেধিয়ে কয় যে সমাজৰ প্ৰতি দায়ৱদ্ধতা স্বীকাৰ কৰিয়েই আমি সকলোৱে জীৱন সমাপ্তিৰ অন্তত কিবা এটা দি থৈ যাব পৰাৰ মানসিকতা সৃষ্টি কৰিব লাগিব। সেয়ে মানৱ সমাজৰ মংগলৰ কাৰণেই আমি সকলোৱেই প্ৰথমতে নিজকে নিজে ভাল পাবলৈ শিকিব লাগিব। তেতিয়া নিজে নিজেই আমি সকলো সকলোৰে প্ৰতি দায়ৱদ্ধ হৈ পৰিম।
উক্ত অনুষ্ঠানত বিশিষ্ট অতিথি হিচাপে অসম সাহিত্য সভাৰ প্ৰাক্তন সহকাৰী সম্পাদক দেৱজিৎ বৰা, গোৱালপাৰা জিলা সাহিত্য সভাৰ সভাপতি ড০ ইব্বাত আলী, সম্পাদক বাণীকান্ত ৰাভা, শালবাৰী জিলা বড়ো সাহিত্য সভাৰ সম্পাদক ৰাজেন্দ্ৰ বসুমতাৰীকে ধৰি বহুসংখ্যক গণ্য-মান্য ব্যক্তি উপস্থিত থাকে।
বিকালী মহাবিদ্যালয়ৰ অধ্যক্ষা ড০ মলিনা দেৱী ৰাভাই আদৰণি ভাষণ দিয়া উক্ত অনুষ্ঠানত সাহিত্য অকাদেমিৰ বঁটাপ্ৰাপকসকলৰ সৈতে স্থানীয় ছাত্ৰ-ছাত্ৰীসকলৰ মত বিনিময় অনুষ্ঠানো অনুষ্ঠিত হয়। অনুষ্ঠানত নিকিতা খাকলাৰীয়ে ভূপেন হাজৰিকাৰ গীত পৰিৱেশন কৰে।
উল্লেখ্য যে উক্ত অনুষ্ঠানতে সাহিত্য অকাদেমিৰ বঁটাপ্ৰাপকসকলক শালবাৰী জিলা বড়ো সাহিত্য সভা আৰু বিকালী মহাবিদ্যালয়ৰ তৰফৰ পৰাও সম্বৰ্ধনা জ্ঞাপন কৰা হয়।
