বানপানীৰ সময়ছোৱাত গুৱাহাটী মহানগৰীকে ধৰি ৰাজ্যখনৰ কোনো প্ৰান্তৰতে যাতে বিদ্যুৎ প্ৰৱাহিত হৈ কোনো লোকৰ মৃত্যু হ’ব নোৱাৰে তাৰ বাবে যথোপযুক্ত পদক্ষেপ গ্ৰহণ কৰিবলৈ মুখ্যমন্ত্ৰী সৰ্বানন্দ সোণোৱালে শক্তি বিভাগক নিৰ্দেশ দিয়ে।
শনিবাৰে জনতা ভৱনৰ মুখ্যমন্ত্ৰীৰ সভাকক্ষত শক্তি বিভাগৰ কাম-কাজৰ পৰ্যালোচনামূলক বৈঠকত মুখ্যমন্ত্ৰী সৰ্বানন্দ সোণোৱালে এই নিৰ্দেশ দিয়ে।
বিদ্যুৎ বিভাগক অধিক কৰ্মদক্ষ কৰাৰ বাবে নিম্ন পৰ্যায়ৰ বিষয়া-কৰ্মচাৰীসকলৰ লগত স্থানীয় বিদ্যুৎজনিত সমস্যা সম্পৰ্কত বুজ লোৱাৰ বাবে বিভাগৰ উচ্চ পৰ্যায়ৰ বিষয়াসকলক ৰাজ্যখনৰ বিভিন্ন এলেকা ভ্ৰমণ কৰাৰ বাবেও মুখ্যমন্ত্ৰীয়ে নিৰ্দেশ দিয়ে।
মুখ্যমন্ত্ৰীয়ে ৰাজ্যখনৰ যিবোৰ প্ৰান্তৰত বাঁহ বা তেনেধৰণৰ অস্থায়ী ব্যৱস্থাৰে বিদ্যুৎ সংযোগ কৰা আছে, বাৰিষাৰ পূৰ্বে সেই ব্যৱস্থা আঁতৰ কৰি বৈদুত্যিক খুঁটাৰ জৰিয়তে বিদ্যুৎ যোগান ধৰাৰ ব্যৱস্থা কৰিবলৈও শক্তি বিভাগক নিৰ্দেশ দিয়ে।
এই ক্ষেত্ৰত জনসচেতনতা সৃষ্টিৰ বাবে বিভাগক যথোপযুক্ত ব্যৱস্থা গ্ৰহণ কৰিবলৈও মুখ্যমন্ত্ৰীয়ে কয়।
বিদ্যুৎ বিভাগৰ এক সুকীয়া পৰিচয় বহন কৰাৰ বাবে বিভাগটোক ব্ৰেণ্ডিং কৰা আৰু কৰ্মচাৰীসকলৰ বাবে ইউনিফৰ্ম বাধ্যতামূলক কৰাৰ বাবে প্ৰয়োজনীয় ব্যৱস্থা গ্ৰহণৰ বাবে মুখ্যমন্ত্ৰীয়ে নিৰ্দেশ দিয়ে।
অহা ১ এপ্ৰিলৰ পৰা গুৱাহাটী মহানগৰীত এই সন্দৰ্ভত এক পাইলট প্ৰজেক্ট আৰম্ভ কৰাৰ বাবে বিভাগৰ শীৰ্ষ বিষয়াসকলক মুখ্যমন্ত্ৰীয়ে নিৰ্দেশ দিয়ে।
শক্তি বিভাগৰ সৈতে জনসাধাৰণৰ মাজত এক সু-সম্পৰ্ক গঢ়ি তোলা আৰু বিভাগটোত কৰ্মচাৰীসকলক উৎসাহিত কৰাৰ বাবে দক্ষ কৰ্মচাৰীসকলক পুৰস্কৃত কৰা আৰু সম্বৰ্ধনা জনোৱাৰ উদ্দেশ্যে ‘শক্তি দিৱস’ অনুষ্ঠিত কৰিবলৈও মুখ্যমন্ত্ৰীয়ে বিভাগৰ শীৰ্ষ বিষয়াসকলক পৰামৰ্শ দিয়ে
