মেঘালয়ৰ সাম্প্ৰতিক ৰাজনৈতিক পৰিস্থিতিৰ প্ৰতি লক্ষ্য ৰাখি সদৌ ভাৰত মহিলা কংগ্ৰেছৰ সভানেত্ৰী সুস্মিতা দেৱে মেঘালয়ৰ কংগ্ৰেছৰ জ্যেষ্ঠ নেতা মুকুল চাংমা পুনৰ মুখ্য মন্ত্ৰী হিচাপে অধিষ্ঠিত হ’ব বুলি সম্পূৰ্ণ বিশ্বাসেৰে মন্তব্য কৰে। মঙলবাৰে ৰাজ্যখনৰ আমপাতি বিধানসভা সমষ্টিৰ উপ নিৰ্বাচন উপলক্ষে কংগ্ৰেছৰ প্ৰাৰ্থী মুকুল চাংমাৰ জ্যেষ্ঠ জীয়ৰী মিয়ানি ডি শ্বিৰাৰ হৈ প্ৰচাৰ অভিযানত অংশ লৈ ৰাষ্ট্ৰীয় অধ্যক্ষাগৰাকীয়ে উক্ত মন্তব্য কৰা দেখা যায়।
আমপাতি সমষ্টিৰ অন্তৰ্গত জয়ফুৰ গাঁৱত কংগ্ৰেছৰ হৈ প্ৰচাৰ কাৰ্যসূচীত অংশ লৈ সুস্মিতাই গভীৰ আত্মবিশ্বাসেৰে কয় যে আমপাতিবাসীয়ে মিয়ানিক ব্যাপক ব্যৱধানত বিজয়ী কৰিব।
‘আমপাতি সমষ্টিৰ জনসাধাৰণৰ লগত মত বিনিময় কৰাৰ সময়ত মই এটা কথা উপলব্ধি কৰিছো যে সমষ্টিবাসী ৰাইজ মুকুল চাংমাৰ সৈতে সংযুক্ত হৈ আছে কিয়নো চাংমাই সমষ্টিটোৰ বাবে বহুতো কৰিছে।‘ এইদৰে ৰাষ্ট্ৰীয় মহিলা কংগ্ৰেছৰ সভানেত্ৰীগৰাকীয়ে মন্তব্য কৰে।
১৯৯৩ চনৰ পৰা একেৰাহে ছয়বাৰলৈ মুকুল চাংমাই আমপাতি সমষ্টিৰ পৰা জয়ী হৈছে বুলি সুস্মিতা দেৱে উল্লেখ কৰি কয় যে ৰাজ্যবাসী বৰ্তমানৰ চৰকাৰৰ কাম কাজত মুঠেই সন্তুষ্ট নহয়।
উত্তৰ-পূবৰ আঞ্চলিক দলসমূহৰ সৈতে বিজেপিয়ে লগ লাগি কংগ্ৰেছক উৎখাত কৰাৰ বাবে তৎপৰ হোৱা কাৰ্য সম্বন্ধে তেওঁ কয়, ‘অসমত বিজেপি নেতৃত্বাধীন মিত্ৰজোঁটৰ চৰকাৰৰ কাম কাজত ইতিমধ্যে মোহভংগ হৈছে অসমৰ জনতা। অসমৰ দৰে ত্ৰিপুৰা আৰু মেঘালয়তো জনসাধাৰণ ক্ষুভিত হ’ব চৰকাৰৰ কাম কাজত’।
বিজেপি নেতৃত্বাধীন চৰকাৰৰ কাম কাজত ভাৰতৰ জনসাধাৰণ মুঠেই সন্তুষ্ট নহয় বুলি কৈ ২০১৯ চনত পুনৰ ভাৰতত কংগ্ৰেছে শাসনভাৰ দখল কৰিব বুলি আত্মবিশ্বাসেৰে মন্তব্য কৰে সুস্মিতা দেৱে।
উল্লেখ্য যে ৰাষ্ট্ৰীয় অধ্যক্ষাগৰাকীক সাংবাদিকে নাগৰিকত্ব সংশোধনী বিধেয়ক প্ৰসংগত নিজৰ স্থিতিৰ বিষয়ে জানিবলৈ বিচৰাত কংগ্ৰেছ নেত্ৰীগৰাকী মন্তব্য দিয়াৰ পৰা বিৰত থাকে।
