বিশিষ্ট ইতিহাসবিদ, টাই ভাষাৰ গৱেষক তথা পণ্ডিত কমলেশ্বৰ গগৈয়ে বুধবাৰে চিকিৎসাধীন হৈ থকা ডিব্ৰুগড়ৰ এখন নাৰ্চিং হ’মত শেষ নিশ্বাস ত্যাগ কৰে।
মৃত্যুৰ সময়ত তেওঁৰ বয়স আছিল ৭৭ বছৰ।
কেইদিন মান আগতে বিশিষ্ট পণ্ডিতগৰাকী ষ্ট্ৰোকত আক্ৰান্ত হৈছিল আৰু ডিব্ৰুগড়ৰ এখন ব্যক্তিগত নাৰ্চিং হ’মত চিকিৎসাধীন হৈ আছিল।
১৯৪১ চনত নামৰূপৰ নগামাটিত কমলেশ্বৰ গগৈৰ জন্ম হৈছিল। গগৈয়ে ১৯৬৩ চনত নামৰূপৰ ব্ৰহ্মপুত্ৰ ভেলী ফাৰ্টিলাইজাৰ কৰ্পোৰেশ্যন লিমিটেডত প্ৰশাসনিক বিষয়া হিচাপে যোগদান কৰিছিল আৰু ১৯৯৪ চনত অৱসৰ গ্ৰহণ কৰিছিল।
এগৰাকী প্ৰসিদ্ধ টাই পণ্ডিত কমলেশ্বৰ গগৈয়ে টাই ভাষা প্ৰসাৰৰ বিভিন্ন দেশ ভ্ৰমণ কৰিছিল।
বিভিন্ন দেশ ভ্ৰমণৰ সময়ছোৱাত তেওঁ ‘ ৰু.লাই’ আদিৰ দৰে টাই বংশৰ বিষয়ে কেইবাখনো গ্ৰন্থ লিখিছিল।
তেওঁৰ মৃত্যুত সমগ্ৰ নামৰূপ অঞ্চলত শোকৰ ছাঁ পৰিছে। মৃতকৰ প্ৰতি শ্ৰদ্ধাঞ্জলি জনাবলৈ তেওঁৰ বাসগৃহত গুণমুগ্ধৰ সোঁত বৈছিল।
প্ৰসিদ্ধ ইতিহাসবিদ তথা পণ্ডিতগৰাকীৰ মৃত্যুত নামৰূপ কৃষ্টি কেন্দ্ৰ, আসম গণ পৰিষদৰ নামৰূপ আঞ্চলিক সমিতি, অগপৰ যুৱ পৰিষদৰ নামৰূপ আঞ্চলিক সমিতি, নামৰূপ ব্ৰহ্মপুত্ৰ ভেলী ফাৰ্টিলাইজাৰ কৰ্পোৰেশ্যন লিমিটেড শ্ৰমিক ইউনিয়ন, নামৰূপ সমন্বয় মহিলা সমিতি, নামৰূপ মানৱ অধিকাৰ আৰু দুৰ্নীতি-নিবাৰক ফ’ৰাম, নামৰূপ প্ৰেছ এণ্ড ছচাইটি, বিজেপিৰ ৰাজ্যিক কাৰ্যবাহী ৰঞ্জিত বৰুৱাৰ লগতে কেইবাটাও সংগঠন আৰু ব্যক্তিয়ে গভাৰ শোক প্ৰকাশ কৰিছে।
মৃত্যুৰ সময়ত গগৈয়ে তেওঁৰ পত্নী, পুত্ৰ, তিনিগৰাকী কন্যা আৰু নাতি-নাতিনীকে ধৰি বহু আত্মীয় আৰু গুণমুগ্ধক এৰি থৈ যায়।
